Imphal Airport nung kilem chirep

Imphal, Rongjui/September 19 (Agencies): Imphal Tulihal airport nung Bodhbar nikongtsütsü tang teyangludak aliba kilem ka chirepa nisung ter tashi kanga mejungi yiruogo. Kilem chirepba kuli tang tashi mejangja.
Iba lendong atalokba osang angazükba sülen IGAR (South) kübok 9 Sector Assam Rifles Tulihal Battalion nungi sepaitem lendong atalokba tesemi aritepa ao.
Media sangdong ajanga ashiba agi, nisung ti tashi kümzüka Regional Institute of Medical Sciences (RIMS), Imphal-i anir ogo aser kasa mapang nung parnok kümzükba mapang nisung tenet tashi ojembiteta liasü saka Luker tesem nung alir mapa inyaker ka kanga mejungi yirur lir.
Ground floor tapak ka chirepba mapang iba tesem nung mapa inyaker parnok 50 shi liasü.
“Nikongtsütsü 5:45pm shi nung airport ground floor nung cargo terminal building kilem chirepba iba lendong atalok. Lendong atalokba mapang mapa inyakertem maneni mapa inyaka liasü,” ta AR ketdangser kati ashi.
“Kilem chireper aliba tesem nung sepaitemi mopung aitsü atema temalen nungi tapok ka patsü aser azü anisemer iba tesem jung junga asadangogo,” ta paisa ashi.
Disaster management additional chief secretary aser Imphal airport director densema police ketdangertemi iba lendong atalokba sülen airport-i oa tensa asadangogo.