Imphal Airport nüngja Bir Tikendrajit ta melentsü

Imphal, August 28 (Agencies): Manipur Legislative Assembly Tulihal International Airport (Imphal Airport ta ajaba) nungi ‘Bir Tikendrajit International Airport’ melentsü telemtetba agiogo.
Iba onük ya Chief Minister N Biren Singh-i benok aser Ibobi Singh-i anir opposition-ia posema nungit.
Imphal Airport ya Manipur state yimtiba nung lir aser Northeast nung Lokapriya Gopinath Bordoloi International Airport, Guwahati sülenbo mazüngtiba airport ji iba ya lir.
Anogoshia Imphal Airport nungi tayimtsü 10 dak tema senzür.
Iba Airport ajanga Bengaluru, Delhi, Kolkata, Ahmedabad, Guwahati, Pune, Hyderabad aser tanga yimti tongtipangtem den sendakteper.
Taoba mapang Manipur yimli nung Bir Tikendrajit ya chuba jabaso ka liasü. Pa ya Manipuri army nung commander ka liasü aser chuba kidang temelenshi adokdaktsü aser iba dang Anglo-Manipur War of 1891 mesüra ‘Manipur Expedition’ ta ajar.
Manipuri chubar jabaso Koireng dang ya Bir Tikendrajit ta sapua aja aser pai par yimli British nunger ket nungi kümzüka ayutsü atema rara.
Pa ya Manipur Chuba Chandrakriti’er jabaso liasü aser British nunger anema rara menaba atema aija 1891 nung süngzü agi alenset.
Paji ground ka nung alenset aser iba tesem dang Bir Tikendrajit Park ta ajar.