Imphal court-i Irom Sharmila anema ken o agienogo

Kolkata, October 05 (Agencies): Meimchir temeten atema inyaker, Irom Sharmila-i soseta asütsü merang, ta la anema ken o benoka aliba küm 16 tashi ken o kayonga aruba sülen Bodhbarnü Imphal nung aliba court kati la anema ken o benoka aliba agienogo.
La anema iba ken o agiena Chief Judicial Magistrate-i, la aitsütsüsa prosecution-i kuli teperi magütsütet, ta ashi.
Chief Judicial Magistrate Imphal West, L Tonsing-i, “IPC section 309 kübok Sharmila-i soseta asütsü merang ta aitsütsüsa prosecution-i kuli teperi magütsütet,” ta ashi.
Tang mezüng talenba salaa court nungi aludang Sharmila-i, “Tangbo ni talenba kecha maliba tetsür ka lir, anungji ni kü indang yimtenren party tenzüktsü. October 10 nü ni yimtenren party tasen sangdongtsü,” ta ashi.
Party tasenba jagi AFSPA anema raratsü asü, ta asüngdangba langzüdang lai, “Ozü yimtenren party-i ‘yimjung, temeten aser temeim’ atema inyaktsü,” ta ashi.
Tamalen AAP, BJP aser JDU densema party balala aikati Sharmila nem party ticket agüja liasü ajisüaka lai magizük.
Tamalen lai sangdong ka ajanga, sangküm Feb-March ita agitsü aliba Manipur assembly elections nung lai Chief Minister, Okram Ibobi Singh den pa indang constituency – Thoubal nungi tokteptsü, ta shiogo.