Imphal-Dimapur lenmang yanglushitsü asoshi akhang

Imphal, March 29 (Agencies): Makhan-Maram lenmang nung bus ka tsükoka nisung 12 asüba sülen All Manipur Inter-State Bus aser Allied Transport Association-i state sorkar dang NH-2 tekaratiba nung yanglushitsü asoshi mepishiogo.
North AOC nung osangbenertem den jembidang association secretary M Bimol-i NH-2 ya state taküm alitsü atema tongtibang lenmang lir, ta ashi.
Iba lenmang kanga tongtipang süaka mapang ajak nung meyanglushi sentoka doktsür, ta paisa ashi.
Yimdaklirtem, Mao police aser Assam Rifles purtemi mapa tajung inyakba atema tenüngsang agütsüba den külemi Bimol-i asür kibongtem den asükhu lemsatepa liasü.
Bus tsükokba lendong nung yirurtem shirnok tang mozüki nung temang anepaludar, parnok nem All Manipur Inter-State Winger & Cruiser Welfare Association, All Manipur Night Super Drivers’ Welfare Association aser association-i senotsü teyari agütsüba, paisa shisem.
Surface Transport Hill Area Drivers’ Welfare Union nung secretary, Kapani K-ia Makhan-Maram lenmang majungba ajanga mapang shia gari tsükokba shisema liasü. Ketdangsertemi lenmang yanglushitsü asoshi mapa tajung inyaktsüla, ta paisa ashi.
“Chakumai yimdaklirtem, police aser Assam Rifles temi mapang shidak nung teyari magütsü asübo ano nisung aika sür lila,” ta Kapani K-i ashi.