Imphal-Jiri Highway nung terenlok maparen tenzükogo

Imphal, April 01 (Agencies): Taruba ita, May nungibo Manipur nung gari lenmang sadema tajungba akumtsü nükjidong nung Manipur atema tongtibang lenmang ana rongnung ka, Imphal-Jiribam highway (NH 37) nung terenlok maparen inyak tenzükogo.
Küm aika BRO-i gari lenmang yanglushiba aser anepaluba agi Manipur nunger aser sorkar melung mesüi liasü.
Osang ka ajanga ashiba agi, tawa BRO dang nungi National Highway Infrastructure Development Corporation Limited (NHIDCL)-i mapa agizükba sülen iba highway yanglu tenzükogo.
Iba maparen mezüngbuba shilem nung iba highway ya sections asem (chainages) küma lemsar yanglushidar.
Mezüngbuba section ji Imphal nungi kilometer 75 talang lir, tanabuba section ji 75 buba nungi tenzüka kilometer 145 tashi lir aser tasembuba section ji kilometer 145buba nungi Jiribam tashi lir.
Section shia atema contractor kaka shima lenmang anepalua yangluba maparen tenzük.
Mezüngbuba section ji HVS Construction Private Limited-i anepalur, aser tanabuba aser tasembuba section ji Nidhi Creative Infrastructure Private Limited aser Bhartiya Infra Private Limited nati anepalua yangludar.
Küm ka atema contractor asemi item mapa ketdangsüa inyaktsü.
Iba dak sentakba nung NHIDCL-i state Chief Minister dang, black topping maparen metembangtetaka May ita mezüngbuba hopta nungibo gari junga senzütettsüsa yanglutsü, ta metetdaktsüogo.