Imphal nung ano maneni Irom Sharmila lumidar

Imphal, April 01 (Agencies) : Delhi court ka ajanga la tai mali, ta obendang agütsüba sülen anogo ana lir külen, activist Irom Sharmila, la ayuba takdang, J.N. Institute of Medical Sciences, Imphal nung ano maneni lumidar. La ayuba takdang ya sub-jail mesükba takdang ka lir.
Lai achi ajem kecha magizükba ajanga ano maneni la tenilen nungi chiyungtsü agütsüdar.
Arishi küm 42 tain, Sharmila ya Armed Forces (Special Powers) Act agienang ta küm 16buba lumir.
La Jantar Mantar, Delhi nung masü tashi lumitsü tenzükba ajanga 2006 küm soseta asütsü liasü ta benokba ken o nung Patiala House Court, Delhi-i Bodhbarnü metenja liasü.
Ato Kilonseri la den sensak asemtsü mapang magütsütetba ajanga la temulung mepelar, ta Brihostibarnü Sharmila Imphal atongba sülen ashi. Lai, India nung democracy tetetzü mangatet aser ibaji ajanga terenlok lenmang nokdanger, ta ashi.
Ni soseta asütsü meranger ta asübaji tai aser Judge Harvinder Singh-i ni metetentsübaji kanga shitak inyakogo, ta liasa ashi.
“Kü nükjidong atongtsü asoshi lumiba ya hadir ka ama amshirba lir. Iba hadir ya Mahatma Gandhi (Father of the Nation)-ia amshiogo. Ni-a mesüner aser kü taküm meimer, ta Sharmila-i ashi.
District aser Sessions court, Imphal West, tetuyuba nung la ya taoba mapanga anaben tashi tepuokdak nungi chioka liasü kechiba süra la soseta asütsü liasü ta benokba ken o nung la aitsüsa kuli kecha mongutet.
Aji oda süaka la chiokli yongi ano tanaben apu kechiyong lai den activist tangar dena lumitsü tenzük.
Ajisüaka tangbo tangari la menungiter aser ibaji ajanga la temulung masür.
“Manipur nungi AFSPA agientsü atema ni lumiba ya anentsü/manentsü atema nüburtem dang nungi telangzüba ka aginer,” ta Delhi nung la chiokli ashi.
La küm paikaya lumiba mapang Centre aser state nungi lenirtemi ojang lumitsü mepishiogo, ajisüaka lai manga.
Manipur Chief Minister Okram Ibobi Singh-i, “Onoki state nung AFSPA agientsü akok. Aikalen nungi tenokdangba aruaka onoki August 12, 2004 nü assembly segments tenet nung tendanga AFSPA agienogo,” ta ashi.
“AFSPA agienba sülen telungpuri tanaben lendong agütsüra ano centre dang tanaben AFSPA meshitsüsa akümtsü,” ta pai ashi.
Delhi nung la den Manipur kaketshirtem arua majurutepdaktsüba asoshi police tem dang mepelar, ta Sharmila-i ashi.
Indian Penal Code (IPC) Section 309 ajanga la ketdangsertem ket nung küm ka ayutsü melar aser küm ka ajung shia la chioker. La mozü agütsüba, tenilen nungi chiyungtsü agütsüba aser security agütsüba atema ita shi state sorkar sen 80,000 entoker.