Imphal nung BJP MLA ka apu

Imphal, January 23 (Agencies) : Honibarnep Imphal kübok Thangal market nung BJP MLA Khumukcham Joykishan-i curfew alema mapa inyakba atema aija police-i apu.
Hokolbar aonung nungi Imphal kübok tesem kar nung curfew alitsü ozüng agüja lir saka MLA Joykishan-i ibaji alema mapa inyakba atema police-i pa apu. Tanep police-i pa anir aoba mapang pa pusemertemi police dak lung agi ona lungkak ait aser idangji police-i tenük amdaktsüba bomb pokdaktsüdang nisung ana tashi yirua lir.
Imphal kübok Thangal street nung sorkari temporary market ka yangluba anema Joykishan aser pa anemertemi lungkak aityonga arur.
Thangal nung market ji meyangludaktsütsü ta Joykishan-i osangbenertem dang ashi. Paisa ashiba agi market ji old Assembly road nunga yanglutsü akok.
Hokolbarnü Manipur nung Education Minister, Moirangthem Okendra-i ashiba agi, sorkari Thangal street nung temporary market ji tembanga yanglutsü.
“BJP MLA-i sorkar dang nungi osang kecha masüngdangi January 16 nungi lungkak aitba sentong tenzükba asoshi sasa bilemtsür” ta Okendra-isa ashi.
Taküm January 4 menoknok ajanga marketing complex ana tashi raksatsüba sülen tetsür shishilembar parnok 1872 nem dokan agütsütsüsa akümer, ta paisa shisem.
Thangal street nung market yangluba den külemi ano sorkari Purana market aser Temporary market nunga dokan pungugu aliba market complex ana yanglutsü sentong lir, ta paisa metetdaktsü.
BJP MLA aser pa pusemertemi semdangtsü ta ajitetba tesem asem nung Imphal West district magistrate, Ningthoujam Geofry-i curfew alitsü tetuyuba agütsü.

You must be logged in to post a comment Login