Imphal nung nisung 8 yiru, ki 9 rongdoktsü

Imphal, April 11 (Agencies) : Imphal West district nung Hombarnü police ana densema nisung 8 yiru aser ki 9 tashi rongdoktsü.
Nisung telok kati ozüng alema inyakdang iba lendong atalok aser iba tesem nung curfew alitsü ozüng agütsüogo.
April 7, 2016 nü Holi sentong ka alidang lanur anati motorcycle ka auyatsü merangdang apu aser tena tepset. Iba tatalokba anema tanü Mayang Imphal Bengoon tesem nung lungkak aitba sentong ka ayongzüka agidang lendongji atalok, ta Manipur DGP control room osang ka ajanga metetdaktsü.
Tanü lungkak aitertemi nisung ana gari nungi aludaktsü aser iba sülen garitem rongdoktsütsü merang. Idangji anameta alirtemi parnok noktang aser iba jagi telok ana tsüngda rara adok.
Iba osang angazükba sülen police tesem tonga ao saka lungkak aitertemi police dak injang kahloktsüdang police ana yiru.
Tensa azüoktsü atema police-i tenük amdaktsüba bomb aser mokozü adokba bomb pokdaktsü aser idangji nisungtem jenshidang parnok trok yiru.
Tanü tatalokba nung lungkak aitertem ki 7 aser parnok anema noktaker ki 2 mi senokja rongdoktsü. Iba tesem nung curfew alitsü ozüng agütsüogo aser tanga tetuyuba ka magütsü tashi ozüngji magientsü, ta Imphal West district magistrate, N Jeofery-i metetdaktsü.