Imphal nung telungpur 4 dena nisung 5 apu

Imphal, August 31 (Agencies) : Security forces puri state nung tesem balala nung telungpur pezü dena nisung pongu puogo, ta police-i Brehostibarnü metetdaktsü. United National Liberation Front (UNLF) telungpur ana aser taoba mapang telungpur aliba nisung ka, ta sepaitemi Imphal valley nungi yashi puogo, ta Superintendent of Police of Imphal East, Kabib-i ashi.
UNLF telungpur ana ket nungi prangbong ka, demand notes aser taoyaba gari ka ta ngutetogo, ta SP-i ashi. Maneni Kangleipak Communist Party nungi züngsem ka Imphal East district, Loushangkhong tesem nungi police commandos aser Assam Rifles sepaitemi külemi puogo, ta police temisa metetdaktsü.
Kasa mapang nung yashi Kanglei Yawol Kanba Lup (KYKL) telungpur ka state police-i Indo-Myanmar arrtsü nung aliba Moreh jila nungi puogo, ta Moreh nung amenoker aliba police officer kati ashi.