Imphal tesem aika metsüngbanger lir

Imphal, July 2 (Agencies): Anogo na tzünglu kanga sashia aruba ajanga Manipur nung tesem aika nung Imphal valley aser state yimtiba dena tsümetsüng agi kongshiogo.
Imphal East district kübok Bashikhong tesem nung Imphal riverbank shilem ka raksaba ajanga nüburtem kanga tetsübu tia nung lir, ta flood control department ketdangsertemi ashi.
Tzü metsüng ajanga kibong 300 shi dak kongshiogo aser parnok aika tekümzükba bushia voluntary relief camps aser sorkari khen atema relief camp agütsübatem bushia ogo. Maneni Imphal nung Nambul ayong moshia ayimba ajanga iba anasa aliba tesemtem dena metsüngbanger lir aser iba den külemi alu aika metsüngbanger lir.
Kasa mapang nung Imphal-Ukhrul nung Mahadev aser Litan na tsüngda nung anentsüh aluba ajanga garitem senzüsenpong mesademi kümogo. Maneni Kangpokpi district kübok Konghom yimtsüng nunga anentsüh alua NH-2 anenbanger lir.
Highway tesem balala nung anentsüh aluba ajanga Dimapur nungi Imphal-i khu bener aoba garitem aser ano tanga garitem aika lendang tsükdaker mesenzüteti lir.
Ketdangsertemi lendong balala agi kongshir alirtem aser relief camps nung alirtem nem parnok nüngdakba asadangtsü asoshi aser agütsütsü asoshi semdangogo, ta flood control department ketdangser kati ashi. Tang tzümetsü aruba ya April tatemlen nungi tenzüka tang agi pezübenbuba lir.