Impur Christian Hospital nung Palliative Care Centre lapokogo

Mokokchung, September 28 (TYO): ABAM taneptsü agutsüba wadang (Healing Ministry) den arok külemi Palliative Care Centre Impur Christian Hospital nung September 28, 2017 anogo nung Minister of Health & Family Welfare and Election, Government of Nagaland, Wb. Imkong L Imchen ajanga lapokja tenzükogo, ta tanü Chairman, Board of Trustee, Impur Christian Hospital, Dr. Sashimeren Aier-i sangdong ka nung metetdaktsü.
Iba centre ya Dr. Uzelie Peseyie, Naga nunger rongnung mezüng Impur Christian Hospital nung Doctor inyaksang (1935-36) nüngtem (Dedicate) nung lapok, ta kasa sangdong nung shia lir.
Palliative care ya shirangertem talisa Cancer, AIDS, temolungjang tashidak ano aika, aser parnok kibongtem shi nung taneptsü aginüba dang masu saka shisatsu aser tanela nung mapang talang ka timtemer asünung anisüngzuk aginür nem item nüngdak agutsütsü nükjidong nung lapokba lir.
Iba centre nung dang cabin trok (6) tashi den nüngdakbatem peria kanga junga renema lir. Minister ajanga nübortem dang iba ama Nagaland nung mezüng facility agutsür asünung ajaki nüngdakba mapang tajangzük agitsü nüngdak, ta ayongzüka liasü.
Impur Christian Hospital Board of Trustees ajanga teyaritepertem aser aria bilemertem ajak dang pelaba lemsatepba metetdaktsü.