Impur nung ABAM Contemporary Social Issues seminar ka agi

Dimapur, Chiteni/July 05 (TYO): Mokokchung district kübok Impur nung ABAM Contemporary Social Issues Seminar ka Zone 1, 2, 3 & 9 atem July 4 aser 5, 2019 anogo agia liasü, ta Executive Secretary, ABAM ajanga sangdong ka nung metetdaktsü. Iba seminar nung arogo 59 nungi Sannükertemi anir tenzükertem parnok 159 tashi arua kanga temoatsü nung agiogo. Iba seminar nung Dr. Maongsangba Associate Professor Dimapur Government College aser Dr. L.Imsutoshi Jamir Director, Clark Communication & Cultural Research Centre (CCCRC), CTC na shisalen sayur liasü.
Shisa len sayur tem ajanga tanü asen lokti nung tebilemtsü aika rongnungi asen tarutsü tia raksatsütsü tashi akaba khurettem; Tetsü oshi samaba, rongsen dak rangloker temeim samaba, palalulaba, atsüapong kasa kiba-kiyiba, temesepba chiyungtsu jateta adokba, election memerükteti agiba, India lima nung tamangba yimsü dak kongshia yimsüsütsü tasa atongba, Naga nungeri nangzüker meinyaktetba ano aika bener arua, asenok shinga jenboa mali asünung, arogoi Tsungrem O den item tangatetba anganü mesüra asen Naga nunger tamang jenjang samatsü mapang arutsü ana nung lir, ta shia item onüktem jangja jangja rasa-a agütsü.
Item tebilemtsu kokteta aotsü asoshi asenoki kanga shisa ka-a Tsüngrem nungi teyari meshia tasü ita kija aser lokti balala dang ya tim masü, yagi asen lima majungtsü ta ochi shia nokdaktsü mapang tongogo, ta nenshia ashi.
Ozu, ni, yimer, tulur aser tilar ta asüba ya asen Aor shisatsü nungi meintoktetra anosa tamajungba tia ajurutsü. Anungji, Tsüngremi mulungba ama alitsü asoshi amangbapur ajaki lokti tebilemtsü asadanga ni/ozü ta asüba indoker asenok ta asüba oshi-i melena temelenshi bener arudi, ta ayongzüka liasü.
Maneni arung asen tangatetba khen meyiba reprangdanger melenshia inyaka asenoki Tsüngrem O dangi meyipa odi ta ABAM ajanga ayongzukba olen ka ABAM ketdangser ajanga sangdong.