Impur nung Wanglin Lowangdong-i Pilgrims Park lapoktsü

Dimapur, Tsüklai 1 (TYO): Impur mission centre nung tanü Arunachal Pradesh nung Nocte kin tekolakba aser taoba mapang MLA alisang Wanglin Lowangdong-i pilgrims park lapoktsüogo. Impur ya Mokokchung jila nungi km 15 shi pilar lir.
Iba park ya pa teyari nung yanglua liasü, aser tanü iba tesem lapokba sentong nung Wanglin-i ABAM aser iba park yangluba nung shilem agirtem ajak tenüng asangba den iba tesem ya Aoer aser Nocte kin tesendaktep kuli asütsü imlaba lemsatep. “Asenok tesem aser sobaliba balala süaka Yisu Khrista temeim kübok sendaktepa lir,” ta pai ashi.
Sentepa aliba lokti ajungshia pai ashiba agi, Impur ya kanga dang temeshi aser tesem balaka lir, aser iba tesem ya nisungshi-i Tsüngrem dak rangloker kanga junga semdangtsü nüngdaker aser iba ajanga Naga nunger aser tangar atema asendenshi tanela animesotsüla.
Paisa ashiba agi, Tsüngrem osang mangashi-i alibapurtem tongtettsü atema bendanga agüja Tsüngrem o peroktsübaji jungdak nüngdak ka lir.
Iba sentong ya ABAM Youth Secretary Toshi sanglir lenisüba kübok aka aser ABAM executive secretary, Mar atsongchanger-i lokti pelaa agizük. Maneni sentong nung Tiameren Jamir-i ken tajung ka aden aser Impur Baptist Church, pastor Rev Teka-i sarasadema sentong tembang.