Impur ya asen Aor Yirusalem

~ L.Ngangshi Jamir, Mokokchung Village.

Impur ya asen Aor Yirusalem asütsü Tsüngremi Dr.Clark ajanga shimteter meshiteta moatsüba temeshi yimti ta asenok ajaki meteta lir. Iba Mission centre ajanga asen Ao lima ajunga dangi aser kin tem dangi pa tekümtet osang tajung yoka temenen talenba salaja nüchi kümdaktsüba masadangtetba pa tesüngmangtsü taochi nung asenok alir.
Yangi tetenzükner ajaki tenzüktsü masüji asen chiri mesüra semchirtemi tenzüktsü yimli mungui arua alitsü, aji oda ano tarutsü anogotem nung a mangutsü akok. Saka iba Mission centre ajanga asenoki meteta aser memeteti asen Aor ajak temoatsü agiba ya asenok shingaia nunga ta meshitetsü.Tenzüktsüjibo tanü kari, asüng kari ta melentepa tenzüktsü. Kar aotsü kar arutsü ta melentepa alitsü. Saka Alima mesema tashi Impur ya alitsü. Impur ya yangi alir kija oset aser senmang masü, ibai asen Ao khristan ajak külem oset aser senmang lir. Anungji asen Ao khristan ajaki kanga apayua aser keta-sena anepalua tajungtiba nung ayutsü merangtsüla.
T.ken 137:5&6. O Yirusalem ni na amadokra, kü teka tachiji-i pei tesangra mapa amadokdakjang. Ni na mebilemtetra; kü tepela tematiba dang taoba ni Yirusalem meyutsüra, kü temeli kü tawa nung neploka kümdakjang.
Israel nunger Babilon nungeri pur oa Bendangli talang nung alar küma liaka yang nungjagia parnoki par temeshi yimti Yirusalem meimba aser menungrabaji koma aser koda tulu liasü bilemdangang!
Pei tasoli nungi pilar tepuodak alidangjia partnoki Yirusalem amadokra par teka tajichi-i tesangra mapa amadokdakjang ta, parnoki par tematiba tepela danga taoba jenjang nung Yirusalem ji meyutsütsürabang parnok temeli tatsük/Sowar kümdakjang ta tashi Tsüngrem dang atemzüktetba ji koda tesüngmangtsüka! parnoki Yirusalemji kodaka aroka meim parnoki atemzükba nung-jagi asenoki angateter.
Yirusalem yimti jara raksaa aliba osang angashir Nehemia-I (Nehemia Tapu 1,2,3) Koda lumia sarasadem, chuba dang temelaba meshir oa taküm bendanga agüja ayatzüra aser timtem toushi jendi akia yanglushi, item ajakji asadanga asenokia asen temeshi yimti Impurji yamaji meimtsü tim. Asenoki Impur sendokra Tsüngremi-a asenok sendoktsü. Impur nung ji shirnok lidir liaka parnok dakji rangloker masü saka Tsüngremi shimtetba asen Aoer temeshi Yimti Impur Mission Centre dakji rangloker asen temulungjang aser tanela ajunga agi meimtsüla aser yangi Hospital, Bible school aser Clark Memorial Higher Secondary school ajak ya tabensaba aser tajungtiba nung ayutsü merangtsüla ta asen Ao Khristanpur ajak den Kü tangatetba lemsateper.