Imtijunglai züluba kaket “Fatherhood: The Best Gift” saya

Dimapur, June 07 (TYO): Wt. Imtijungla Longchar-i züluba kaket 22buba “Fatherhood: The Best Gift” tanü June 07, 2019 nü Muffet’s Pantry, Duncan Basti, Dimapur nung sayaogo; iba sentong nung lar kibong züngsemtem, DABA Associate Pastor Rev. Imly Jamir aser osangbenertem dena liasü.
Iba sentong nung jembidang Imtijungla Longchar-i, iba kaket ya kibong nung tebu ka shilem aser teinyaktsü khurettem indang lir, aser iba kaket ya tetsürtem tangatetba tsütsülen nungi zülu, ta metetdaktsü. Laisa, iba kaket nung tebu ka shisangdaktsüba indang shia lir, koba ajanga nisungtem ajungmesotsü; iba kaket ya tamangba yimsü kecha mebendangi ajaki züngtettsü akok, ta ashi.
“Tebu kaji kibong nung ainkar, putir aser tatishitsü tajung sayur ka lir,” ta laisa ashi.
La kinüngbu aser Discipleship Bible College, Dimapur nung Principal, S Wati-i, kibong ka nung tebilemtsü timtibaji tebu ka tebilemtsü lir, ta ashi.
“Tebutem aikati melenshiner. Parnoki tebu tajung ka kümner. Anungji tebuti ka shilem indang kaket züluba ajanga aika tajangzük angutsü,” ta paisa ashi.
Imtijunglai, iba kaket ya asen nisung den medemdanga züluogo, anungji tebutemi pei dak sendaktepa aliba aika züngshitsü, tebutem temoatsü anguba dang masü saka chirnur aser tetsütemia tebu ka shilem tajungba angatettsü, ta metetdaktsü.
Iba kaket zülutsü atema la ajungshibaji la kinüngbu, S. Wati lir; la pai dang “tetemsü tebu” ta ajar, yamaji iba kaket ya pa nüngtem nung adoktsüogo.
Imtijungla Longchar ya tesayur ka, kaketzülur ka, sayutsüngir ka aser lanurtem, tetsürtem aser kibongtem seminar nung shisalen sayur ka lir.
“Fatherhood: The Best Gift” kaket ya Northeast tesem balala nung aliba Christian book stores ajak nung sen 200/- agi talitsü angutsü.