Imtikümzüki Jenangsanger Nangnong lenmang lapoktsü

Nagaland Legislative Assembly Deputy Speaker, Imtikümzük-i Ungma lushi nung Jenangsanger Nangnong Agri link road lapokba temaitsü lungzüng ka azüngtsür külen pa temeim kinüngtsü, Imkongla Jamirtsür densema Mokokchung Deputy Commissioner, Sushil Kumar Patel IAS aser Ungma putu yimsüsürtem külemi tangokba noksa nung angur. Ungma, March 4, 2017.

Ungma (Mokokchung), March 04 (TYO): Ungma yim nungi kilometer pezü shi pilar Jenangsanger Nangnong Agri Link Road ta sür lenmang ka Nagaland Legislative Assembly Deputy Speaker, Wb. Imtikümzük-i Honibarnü lapoktsüogo; Iba lenmang Ungma Baptist Arogo Pastor Rev. Dr. Noklen Lkr-i sarasadema meshitettsü.
Tanü iba sentong nung tongti tesemdanger Wb. Imtikümzük-i jembidang, alu maparen balala inyaktsü atema tzü aser lenmang nüngdaker. Aji oda, Ungma yim ya Mokokchung jila anasa alinung, iba nungi chiyungtsü aser osettsüset tapu meyina züsenteta/inyakteta nübur nem agütsütsü tim, ta ashi.
Tanü alima nung nüburtemi mozü-mora kecha meinoki züsentetba chiyungtsütem dang teimba sabua kümdaki. Anungji, aluyimeri akok tashi mozü-mora kecha mamshii chiyungtsü tapu balala züsenteta inyaktsü asoshi paisa ajungshia liasü.
Tanü rongsenkettsüng tsütsü reprangdangra asenoki joko alu ayimtsü mejangrar, tzümartemi bener aruba dang alia agir aser chiajemteper. Anungji, tangar dak metaloka melii meranga inyaktsüla, ta paisa inyakdaktsünüba olen ka ashi.
Mokokchung jila rongsenren ajungkettsü asoshi Ungma nunger dak tulu ka lir, anungji, Ungma nungeri anir meranga inyakba sobaliba tenzüktsüla, ta paisa tayongzükba ka agütsü.
Terenlok mapa inyaktsü tebilemba aika lir, anungji, teka amateper mapa tajung inyaktsü tebilemba aser tangatetba alitsü asoshi paisa shisema liasü.
Nüburtemi nüngdakba mapang ka lenir Imtikümzüki teyari tulu agüja iba lenmang yanglutsüba asoshi pelaba Wb. Imli Imsong Tatar ajanga metetdaktsü. Iba lenmang ajanga yimertem lenmang aisü nung tajangzük angutsü imlar, ta paisa shisem.