Imtilemba Sangtam-i NSCB Ltd Data Center lapoktsü

Mongulbarnü Cooperation Advisor, Imtilemba Sangtam-i NSCB Ltd headquarter office, Dimapur nung Data Center lapoktsüba angur. August 11, 2015

Dimapur, August 11 (TYO) : Mongulbarnü Dimapur nung Cooperation Advisor, Imtilemba Sangtam-i Nagaland State Cooperative Bank (NSCB) Ltd headquarter nung Data center ka lapoktsüogo.
Iba Data center lapokba ajanga NSCB nung banking technology tasentiba enoksemogo aser Core Banking System (CBS) ajanga bank kongsang 21 sendaktepogo. Tang nungi NSCB customer temi linük nung tesem mashii ka nungi sen yoktettsü.
NSCB nung loan recovery maparen jangramadem anungji bank ketdangsertemi sen apurtem dang nungi sen meshitsü atema meranga inyaktsüla, ta tanü tongti tesemdanger Imtilemba Sangtam-i ayongzük.
Sen apurtemi tagütsütsü tim magütsüra guarantor tem dang nenshitsüla mesüra service loan agiba süra sen apur sorkar mapa inyakertem indang itasen nungi sen katizüktsüla. Sen aputsüba sülen tangutsü tim mapang nung sen meyipa angutsü atema bank-i inyaktsüla, ta paisa ashi.
Bank nüngdakba mapang aser khuret ajurudang Nagaland sorkari teti teyari agüja arur. Ajisüaka asenoki bank ketdangsüa aotsü atema teinyaktsü lateta alibatem sülen manidakra, alizüng metongtettsü. Anungji asenoki meyipa reprangshitsüla aser bank lapokba alizüng tonga inyaktettsü atema meranga inyaktsüla, ta tongti tesemdangerisa tayongzükba agütsü.
Imtilemba-isa bank, customers aser public ajak dang NSCB Ltd bank meima sen rizüngtsü aser bank nungia teyari agütsüba agitsü mepishia metetdaktsü.
Sentong nung Vice president & COO-East & SAARC countries, Sify Technologies Ltd, Nihar Chakraborty-i mapatong indang osang metetdaktsü, Tali Longkumer, vice chairman NSCB ltd, Vilasa Nakro, RCS, Nagaland, A K Biswas, assistant general manger, NABARD, Regional office, Dimapur aser Technical Director, National Informatic Centre, Kohima nungertemi o tatsütsü jembi.
Sentong nungsa Imtilemba Longkumer, MD, Nagaland NSCB Ltd-i tesentepertem pela agizük aser Pankaj Bhattacharjee, DGM (IT) NSCB Ltd-i anküp tepela o jembi.