INC candidate yaritsü mepishir

Dimapur, March 16 (TYO): 2019 Lok Sabha election nung INC candidate aser taoba chief minister K.L. Chishi yariang ta Congress-i mepishia metetdaktsü.
“Taoba mapang onoki kasa tangatetba aliba political party tem dang Congress candidate yariang ta mepishiogo aser parnoki maneni yaritsü imlar,” ta NPCC President K. Theire-i ashi.
“Onoki kasa tangatetba aliba party tem, teloktem aser lokti tentet balala den asüngdangtepba sülen INC candidate asütsü atema K. L. Chishi shim. Pa ya aika ajangshia aruba nisung aser lennir tejen ka lir,” ta paisa ashi.
AGP-i CAB anema NDA aser NEDA den tesentaktep pila. Amit Shah-i Guwahati nung February 17 nü BJP-i sorkar akümtsü tanaben maongka ngura CAB agizüktsü ta metetdaktsüba sülen AGP-i BJP den yariteptsü lemtetba ajanga temulung melemtep adokdaktsü aser maaksü nguogo. Iba telemtetba ajanga linük tsüngdang North East tamaitsü tai ka sayuogo anungji asenoki Amit Shah indang tebilemba matalokdaktsütsüla, kechiyong iba ibaji Nagaland atema dang masü saka North East ajunga atema majung, ta K Therie-isa metetdaktsü.
Centre nung sorkar akümtsü maongka ngura Congress-i CAB agientsü. Talisa Indian National Congress aser Nagaland Congress tenzükertemi tesüiba mapang yimten telemtetbatem agiogo aser iba jagi asenoki Statehood indang süngjangtem achir aser asenok Arrla 371(A) agi kümzüka lir, ta paisa ashi.