Income tax ketdangsertemi nisung 3 den sen cr. 106 apu

Chennai, December 09 (Agencies): Tanü agi anogo ananübuba Income tax ketdangsertemi Chennai nung amenoka aliba shishilembar ki asem mita ao, aser tang tashi nung income tax investigation wing-i sen crore 106 (sen tejenba aser tasenba notes naprong) den hon seret 127 puogo.
Sen crore 106 nungi sen crore 96 notes ji tejen liasü aser sen crore 10 ji sen tasenba notes, sen 2,000 notes timba ser apu.
Parnoki Industrialist, Shekhar Reddy, pa den inyaksemer Srinivasa Reddy aser parnok atema agents Prem Kumar nunger ki mita oa liasü.
“Ozü wing nungi ketdangser 100 dak temai ki mita odar aser Chennai o Vellore na nung maneni tesem 9 mita odar,” ta I-T ketdangser kati osangbener dang ashi.
Brihostibarnü mita aodang takdang ana shibanger liasü. Reddy-i takdang anaji melapoktettsü, kechiyong pa ket nung sabi mali ta ashi, saka onoki takdangji kakpokba sülen sen den honji angu,” ta ketdangserisa shisem.
Sen aser hon napronglaji Sekhar Reddy meyong liasü. “Sen aser hon ajakji pa meyong lir ta pai ashi. Ajisüaka onoki pa indang accounts reprangshiba sülen ang ibaji pa meyong asü masü’ar jangjatsü,” ta ketdangserisa ashi.