Inderjeet-i küm 4 tashi metokteptsü temerenshi angutsü akok

New Delhi, August 02 (Agencies): India nunger shot-putter, Inderjeet Singh-i ozüng alema tali tashi itshitsü mozü mora achiba osang tanaben bushitetba sülen pai ayuba India tenüng nung Rio Olympics nung shilem agitsü mangdang samatsüsa jenjang tamajung ajuruogo.
Asian Champion, Inderjeet-i ozüng alema androsterone aser eticholanolone mozü achiba osang putetba osangji National Anti-Doping Agency (NADA)-i tanü, Mongolbar nü metetdaktsü.
Tan mozü mora achiba ken o nung pai shitakbasa aibelenba kuli nguteta, pa aitsüra, World Anti-Doping Agency (WADA) temzüng tasenba nung ajemdaker, Inderjeet nem küm 4 tashi tetoktepba balala nung shilem magitsü terenemshi agütsütsü akok.
India nunger tongti melangteper, Narsingh Yadav-i ozüng alema mozü mora achiba ken o nung aibelena mali ta shia, NADA-i pa metentsür anogo 2 buba nung Inderjeet-i ozüng alema mora achiba osang ya tanaben bushiteter lir.
Ajisüaka, “Pei temang nem timtem agütsür ta metetsümonga asayar kati mozü machitsü,” ta shia, pa anemertemi pai achiba chiyongtsü nung mozü inoktsü asütsü akok ta arishi küm 28 tain Inderjeet-i pa metentsü olen ka metetdaktsüogo.