Inderjeet Singh indang senotsü jenjang kangasa mejungi lir

New Delhi, July 22 (Agencies): India aser Asia na nung Shotputter No. 1, Inderjeet Singh indang senotsü jenjang kangasa mejungi aliba osang jangjaogo.
India’er asayartem rong nung Rio Olympics nung shilem agitsü jenjang mezüng angusang, Inderjeet indang senotsü jenjang kangasa majungba yong Rio Olympics atema terenemshiba agitsüren nem tetsükdakba tulu bener arutsütsü tenzüka lir.
Aso tar feet 6 ser inch 5 talang aser temang touzük seret 150 taret Inderjeet-i Wuhan nung asayaba Asian Athletics Championships gold aser South Korea nung ayongba World University Games gold na densema taoba ita 2 tsüngda nung international medal 6 tashi agizüka lir.
“Ni tesüsa shilem agiba asayamong 3 nung otsü tasen yanglua takok marok agizükogo. Ajisüaka, kü den yariteptsü doctor aser physio shinga mali. Kü coach künati team ka küma tang terenemshiba agitsü tenzüka lir. Ni ajungbena yirura, ni nungiter shinga mali aser kü tenüng India team nungia agienadoktsü,” ta Inderjeet-i temulung shiranga ashi.
Tebu 2007 küm asüba sülen Inderjeet’er kibongi Madhya Pradesh nung tentetba süoshi dokan 2 tashi yokdoktsüsa akümba den külemi, medemer, kinünger aser bank balala nungi sen apua Inderjeet nungita aru.
Inderjeet-i yaküm, 2016 küm Incheon Asian Games bronze medal agizükba sülen par Haryana sorkari pa nem senpet sen lakh 75 agütsütsü nangzük saka arishi küm 28 tain Inderjeet-i tanü tashi iba senpet senji mongui lir.
India’er Sports Ministry-i tenzükba Target Olympic Podium (TOP) mapatong nung Inderjeet tenünga inoksema lir saka Inderjeet-i iba mapatong nungi senpak ka danga mongui lir.
“Taruba August ita Beijing nung asayatsü ayongba World Championships nung ni takok ngua shilem agira, India sorkari kasaji ngua ni yari tenzüktsü imlar,” ta Inderjeet-i metetdaktsü.