India 2015 FIBA Asian Championship 2 buba round-i iogo

Changsha, September 25 (Agencies): India’er basketball teloki tang China kübok Changsha nung tasayadak 2015 FIBA Asia Basketball Championship asayamong 2 buba round asayatsü jenjang tanü Hokolbar nü nguogo.
India-i tanü Japan den asayaba Group A preliminary round asaya nung tamakok ajuru saka par teloki Malaysia madak takok ngua aliba yong tan asayamong indang 2 buba round nung maneni shilem agitsü jenjangji angu.
Japan teloki points 83-65 ngua India tsükdaktsüba sülen Group A nung temaba jenjang angur telok tarensen nung tanabuba jenjang ajangzük.
Iran teloki preliminary round asaya asemprongla nung takok anguba sülen points 3 ngua tang temaba jenjang ngua lir.
India asayartemi tanü mezüngbuba quarter nung points 18-15 ngua temaba jenjang nung asaya saka Japan-i tanabuba quarter asaya tenzüker mezüngbuba minute 7 tashi nung points 16-7 ngua India den temaba jenjang nung asayatsü tenzükba sülen India nem ken danga temaba jenjang magütsüi tanü asayaji kokadok.