India-a Ransomware nem külakzükdaktsür linük temaba 5 nung dena lir: Kaspersky

New Delhi, June 4 (Agencies) : Ransomware inyakyim nem külakzükdaktsür temaba linük pongu nung India-a densema lir. Iba malware yagi nüburtem pei system sadema lapoka amshitettsü atema sen meshir, ta Russia nung amenoka aliba software security group Kaspersky Lab nung inyaker kati ashi.
“Ransomware-i India nung kanga jeluzüker,” ta Kaspersky Lab nung APAC Global Research & Analysis Team tekolakba, Vitaly Kamluk-i IANS dang ashi.
New Delhi nung “Security Threat landscape” omen nung ajemdaker roundtable senden ka amenba mapang Kamluk-i asadangteta aliba osang lemsatepba nung March nungi May 2016 tashi nung Teslacrypt ransomware agi külakzükba linüktem rongnung India mezüngbuba nung lir aser Locky ransomware agi külakzükba nung jenjang pezübuba nung aliba tuteta sayu.
March nungi May 2016 tashi nung India nunger nisung 11,674 tashi TeslaCrypt ransomware aser nisung 564 Locky ransomware nem külakzükdaktsüogo.
Locky ya Windows ransomware lir aser iba yagi windows tapu ajak nem timtem agütsür. Locky ya Februay 2016 nung chiok.
TeslaCrypt ransomware ya tangbo joko mapa meinyaker.
Kaspersky Labs ajanga ngutetba osang lemsatepba mapang Kamluk-i, Karnataka state nungi noklang nung shilem 36.58 aser Tamil Nadu nung shilem 16.72 ransomware agi külakzükogo, ta ashi.
Iba sülen Maharashtra nung shilem 10.86, Delhi nung shilem 10.00, West Bengal nung 6.70, Uttar Pradesh nung shilem 5.33, Telangana nung shilem 4.54, Kerala nung shilem 3.87, Gujarat nung shilem 2.35 aser Haryana nung shilem 1.96 külakzükdakja lir.
Internet nung tang ransomware tapu pongu longdar– encryption ransomware, master boot record (MBR) ransomware, screen locker, ransomware encrypting web servers aser mobile device ransomware. Item ransomeware yagi Android ajanga amshiba oset nung timba timtem agütsür, ta Kamluk-i metetdaktsü.
Item jagi sen magütsüra system mamshitettsü ta ashidang sen agütsütsü magütsütsüla ta asüngdangdang, pai, magütsütsüla, kechiba süra sen agütsüba sülen parnoki nangzükba inyaktsü meinyaktsüar memetet, ta langzü.
Item nungi kümzüka alitsü atema backup nüngdaker aser pei-i temulung lemtetba antivirus solution tajung amshia mapang shitak nung update asütsüla, ta paisa ashi.
Pai, sorkar aser antivirus company tem teka amteper inyaktsüla, ta ashi.