India ainba ajanga kidangertema tajangzük angutsü: Modi

New Delhi, June 18, 2016:  Honibarnü New Delhi nungi video conferencing ajanga Ato kilonser, Narendra Modi-i Jaffna, Sri Lanka nung tawa yanglushiba Duraiappah Stadium lapoktsüba noksa nung angur. Kasa noksa nung Union Minister for External Affairs, Sushma Swaraj aser tongtibang ketdangsertema kar angur. India-i sen crore 7 intoka iba stadium yanglushitsü.

New Delhi/Colombo, June 18 (Agencies): India-i linük rongsenkettsüng ainba ajanga kidanger linüktem nema tajangzük ngudaktsütsüla ta bilemer, ta tanü Ato kilonser, Narendra Modi-i metetdaktsü.
Sri Lanka,  Jaffna nung India-i yanglushitsüba stadium ka tanü Ato kilonser Modi aser Sri Lanka Tir, Maithripala Sirisena nati lapokja liasü.
India-i iba stadium yanglushitsüba atema pelaba lemsatepdang Lanka Tir, Sirisena-i, mapang kaka nungbo tangatetba tai aser teratetba tai liaka Lanka-i linük ana tesentaktep tajungtiba akumtsü atema bilema lir, ta metetdaktsü.
Taoba mapang Jaffna Mayor, asür Alfred Thambirajah Duraiappah nüngtem nung yangluba Duraiappah Stadium ya Modi aser Sirisena nati lapoktsü.
Iba stadium ya 1997 küm nungi mamshii aruba sülen India sorkari sen crore 7 intoka yanglushitsü.
Iba ya tongtibang anogo ka lir ta shia Modi-i Sri Lanka linük dang, India-i ner linük terenlok lenmang nung jajadang yariteptsü, ta ashi.
New Delhi nungi video-conferencing ka ajanga Ato kilonser Modi-i iba stadium lapoktsüba sülen pai, “India-i Sri Lankha linükji rongsenkettsüng nung azükarudaktsüner. Sri Lanka ya telongjem, yimjung, tesünep aser senso ajaki kasa maongka anguba linük ka südaktsüner,” ta ashi.
“Asen tesentaktep ya sorkar ana indang kija masü. Iba tesentaktepji asen puti otsü, sobaliba, oshioben, art aser geography nunga lir. India-i, linük rongsenkettsüng ainba ajanga kidanger linüktema tajangzük ngudaktsüner,” ta paisa ashi.
Modi-isa, tongteprateptsü atema tanü puto technology ajanga India nunger billion 1.25 aser Sri Lanka nungertemi iba benjung nung shilem agiteter, ta ashi.
“Küm 20 ataba sülen nenok teka amaba aser pelatepba ajanga iba Duraiappah stadium tanela tanaben shia arutsü. Onok kilometer merirjang aika pilar Delhi nung mena liaka Jaffna nung nenok temelenshiji onoki meteter,” ta paisa ashi.
Tang yanglushiba stadium nung nisung 1,850 tashi mentettsü aser iba stadium nung saisapong balala ajungkettsü atema maongka agütsütsü, iba den külemi rara agi raksatsüba tesem, Northern Province nung aliba lanurtem aika lenla aisülen tajangzük angutsü.