India anema inyakba magizüktettsü: Rajnath

New Delhi, Feb. 12 (Agencies): Home Minister, Rajnath Singh-i, India anema yimyim ayimertem nem temerenshi tulu agütsütsü, aser ibaji kodanga magizüktsü, ta ashi.
Hokolbarnü New Delhi nung osangbenertem den jembidang Rajnath-i, “nisung kari danga India anemba yimyim ayimra, aser linük longjema aliba atema tasüngdangba akatsü merangra parnok dang tai matoktsü. Parnok nem temerenshi tulu agütsütsü,” ta ashi.
Mongolbarnü Jawaharlal Nehru University (JNU) campus nung India anema inyakertem nem temerenshi tulu agüjang ta Rajnath-i police dang ashi.
JNU Campus nung sentong ka alidang, 2013 küm Parliament amakba ken o nung aija Afzal Huru alenseta südaktsüba atema kaketshir telok kati sorkar aser linük anema yimyim ayima liasü.
ABVP-i sentong akatsü ashishiba ajanga University ketdangsertemi iba sentongji akatsü memela, ajisüaka kaketshir telok kati iba sentongji agi.
BJP MP Maheish Girri aser ABVP nati ken o agütsüba sülen Brihostibarnü Delhi Police-i sorkar anema inyakba ken o ka züluoka liasü aser Hokolbar nikongdang police-i Jawaharlal Nehru University Student’s Union (JNUSU) Tir, Kanhaiya Kumar apu.
University nung kaketshir kati, “Police kar uniform mesemi campus-i arua hostel aser convention centre densema tesem aika mita aoba sülen Kanhaiya apu,” ta ashi.
Iba dak sentakba nung sangdong ka ajanga Vice Chancelor, M Jagadesh Kumar-i, “Campus nung o tokteptsü atema JNU-i temeten agütsür, saka Linük Temzüng alema inyaktsü atema University ji sabang ka ama amshibajibo aitsür. Ajisüaka temeten agütsübaji kari tai angateta amshi südi,” ta ashi.