India armed forces temi sen crore 800 alang Ashok Leyland mangaogo

New Delhi, March 29 (Agencies) : Indian armed forces temi sen crore 800 alang gari manga lir, ta tanü Mongulbarnü Hinduja Group meyong Ashok Leyland company-i metetdaktsü.

Parnoki mangaba ama onoki Field Artillery Tractor (FAT) 6×6, gari 450 aser gari tashi tait kar den ambulance 4×4, gari 825 yoktsü, ta Ashok Leyland sangdong ka ajanga metetdaktsü.

“Tanü asüng tensa aser technology den putepa parnoki Field Artillery Tractor (FAT) 6×6 aser Ambulance 4×4 garitem ya mangarba lir,” ta Ashok Leyland Managing Director Vinod K Dasari-i ashi.

Iba amai sen aika alangba garitem mangaba ajanga company dak armed force-i nüngdakba oset yanglutsü tashi ita aliba sayur, ta pai shisem.

“Onoki ‘Make in India’ inyakyim dak ajemdaker India nunger armed force tem den ka küma lungjemer tensa den apet inyakyim tajungba küma terenlok keta bener aotsü akhanga nokdaker,” ta Dasari ashi.

‘Super Stallion’ tarensen nung Field Artillery Tractor (FAT) 6×6 garitem ya artillery prangpong tem akatsü atema kilem kolak ama amshitsü. Iba gari nung sepaitemi prangpong amshidang nüngdakba ajak kanga sadema amshitettsü. Gari ya ano nüngdakba oset belenshitsü aser rara mapang kanga nüngdakba tesemtem nung amshitettsü.

Iba den külemi Ashok Leyland-i yangluba air-conditioned Ambulance 4×4 gari ajanga yiruli teyari agütsütsü.