India aser B’desh tsüngda defence tezüngzüktep agi

New Delhi, April 08 (Agencies): Ato kilonser, Narendra Modi aser Bangladesh Ato kilonser, Sheikh Hasina na takok ngua senden amenba sülen Honibarnü India aser Bangladesh na tsüngda defence aser civil nuclear nung amaliteptsü densema tezüngzüktep 24 agiogo.
Tanü New Delhi nung Hasina den külemi osangbenertem senden nung jembidang Modi-i defence atema India-i Bangladesh nem US sen million 500 aputsür, ta sangdong.
Modi-i, “Bangladesh nüburtem aser parnok azükaru atema India-i teti nungita arur. Bangladesh atema onok ya mapang talang ka nungi terenlok nung temelung lemtetba partner ka lir. India aser Bangladesh nati amalitepba süngjangji nüburtem nema chidaktsütsü,” ta ashi.
Linük ana partnership atema Modi-i Sheikh Hasina den onük aika nung o lemtepa liasü.
Lenir anatisa India aser Bangladesh tsüngda railway aser bus service tasen tenzüktsü, iba den külemi rail link asentenshia lapoktsü.
Ato kilonser anati Maitree Express train tenzüktsü; iba train ya Kolkata aser Bangladesh nung aliba Khulna na tsüngda senzütsü, iba den külemi aser Kolkata nungi Khulna ajanga Dhaka tashi senzüba bus service-a tenzüktsü.
North Bengal nung Radhikapur aser Bangladesh nung Biral na tsüngda train senzüba anener liasü, aser iba train ji tanü asentenshia Assam kübok Numaligarh Refinery nungi senzü tenzükogo.
Ajisüaka linük ana tsüngda Teesta tzü lemsateptsü atema tezüngzüktep agia alibabo tang tashi mapa mekümteti lir. India-Bangladesh tesendaktep atema iba tezüngzüktep ya tongtibang lir, ta shia Modi-i, India-i iba atema inyaktsü, ta nangzük.
Modi-i, Teesta tzü lemsateptsü onük atema tekaraba nung inyaktsü, ta ashi.