India aser China arrtsülen Centre sorkari gari lenmang 44 yanglutsü

New Delhi, January 14 (Agencies): Centre sorkari China linük den arrtsülen kanga tongtibang gari lenmang 44 yanglutsü, aser Pakistan den arrtsülen Punjab aser Rajasthan na nung kilometer 2100 nung lenmang yanglutsü, ta Central Public Works Department (CPWD) osang ajanga metetdaktsü.
Tan ita tetenzüklen Central Public Works Department (CPWD)-i Annual report (2018-19) sayaa liasü, aser iba agency dang China aser India na tsüngda rara adok nunga sepaitem kerakera senzütettsü atema India-China arrtsülen kanga tongtibang lenmang 44 yanglutsü atema tetuyuba agutsü.
India aser China na tsüngda kilometer 4000 talang Line of Actual Control ya Jammu & Kashmir nungi Arunachal Pradesh tashi nung lir.
India den arrtsülen China-i project mapa aika tongtibang süa inyakba mapang ka nung CPWD-i iba osang ya metetdaktsür.
Kasa osang ajanga ashiba agi, linük ana arrtsülen yanglutsü aliba lenmang 44 ji sen crore 21,000 shi indoka yanglutsü.
Kasa osang ajanga, “India-China arrtsülen state pongu- Jammu & Kashmir Himachal, Uttarakhand, Sikkim aser Arunachal Pradesh nung kanga tongtibang lenmang 44 yanglutsü atema CPWD nem mapa lemzüktsüogo,” ta metetdaktsü.