India aser China nati amalitepa inyaktsü atema lenla 10 jangjaogo

New Delhi, Luchii/December 21 (Agencies): Taküm April ita nung China kübok Wuhan yimti nung Ato kilonser, Narendra Modi aser China Tir, Xi Jinping na ajurua senden amenba sülen tanü India aser China nati linük ana nüburtem tsüngda amalitepa inyaktsü atema lenla 10 jangjaogo, ta osang ka ajanga metetdaktsü.
Chinese State Councillor aser Foreign Minister, Wang Yi den tang mezüngbuba India-China High-Level Mechanism on People-to-People Exchanges senden amenba sülen New Delhi nung 3buba India-China High-Level Media Forum nung jembidang External Affairs Minister, Sushma Swaraj-i, Wuhan nung Modi aser Xi na senden amenba mapang nung linük ana nungi nüburtem tsüngda cultural exchange alitsü atema amalitepa inyaktsü asoshi jembia liasü, ta metetdaktsü.
Yaküm India-Bhutan-China international trijunction nung aliba Doklam nung linük ana sepaitem tsüngda anogo 73 tashi raratsüsa tensa ka ajuruba sülen linük ana tesendaktep tajungba akumtsü atema Xi-i Wuhan summit ayongzüka liasü.
Swaraj-i, “Asen lenir anapronglai nüburtem tsüngda tesendaktep tajung yuner, koba ajanga linük ana tesendaktep ano tajungba akumtsü,” ta metetdaktsü.
Hokolbarnü ghonda ana amenba sendenji taoba mapang senden dang nungi khenyongi balaka liasü, ta shia lai, linük ana tsüngda cultural exchanges tesendaktep alitsü aser nüburtem tsüngda tesendaktep alitsü atema rangloker senden amen, ta metetdaktsü.
“Tanü onoki nüburtem tsüngda amalitepa inyaktsü atema lenla 10 tashi jangjaogo: cultural exchanges, films & television co-production, media, sports, youth affairs, tourism, state aser yimtitem tsüngda exchanges, traditional medicine, yoga aser academics densema lir,” ta Sushma Swaraj-i metetdaktsü.
“Linük anapronglai tajangzük kateta o lemtepogo, ni melung kanga asür. Iba ya China-i achaayangba ajanga lir,” ta lai metetdaktsü.
Lenla balala nung joint forums ajanga linük ana tsüngda kati ka dak tamang katettsü, ta shia External Affairs Minister-i, iba nung ya osangbenertemi agitsü tongtibang shilem ka lir, ta ashi.
Laisa, “Tesüiba küm 40 tsüngda reforms ajanga China kanga keraa renlokogo aser rongsenkettsüng ajungketer,” ta ashi.
“2025 küm tashi nungbo India rongsenkettsüngji US sen trillion 5 akumtsü aser linük anati amalitepa inyakba ajanga asenok ajak ajangzüktsü,” ta lai ashi.
Wuhan yimti nung senden amenba sülen China-i mera tajung aika agia inyakba atema pelaba lemsatepa Sushma Swaraj-i, tangbo India aser China sepai napronglai amalitepa inyaker, ta metetdaktsü.
“Tanübo asenoki regional aser international onük aika nung longjemer inyaker. Melung kanga süa küm tembanger,” ta lai ashi.
Ano külen Wang-i, iba senden indang Sushma Swaraj-i ashiba ajakji shidak, ta metetdaktsü.
“Tanü senden kanga takok ngua agiogo. Cultural exchanges aser nüburtem tsüngda tesendaktep yangluba nungi tuluka imlar,” ta paisa ashi.
“Nübur tsüngda tesendaktep ajanga China aser India na dang masü saka alima rangben ajangzüktsü,” ta pai ashi.
Tanep iba senden jakdang Ato kilonser, Narendra Modi-i, linük ana kanga keraa renloktsü atema iba partnership ya tashi tasen ka akümtsü, ta lemsatepa liasü.