India aser China sepaitem Republic Day nü LAC nung senden amen

Jammu, January 26 (Agencies): India aser China sepaitem Mongulbarnü Jammu & Kashmir nung Ladakh tesemlen aliba Line of Actual Control (LAC) nung 67buba Republic Day nüngtem nung senden ka menogo.
India sepai meyong Udhampur headquartered Northern Command nung otongdar, Colonel S.D. Goswami, “Ladakh anüdoklen 67buba India Republic Day nüngtem nung India aser China sepaitem rongnungi arrtsülen anüker sepaitem ajurutepa senden ka menogo,” ta ashi.
“Chushul-Moldo Meeting Point nung Brigadier R.S. Raman aser colonel tain Cheng Zheng Shan nati anir mena liasü aser Daulat Beg Oldie Meeting Point nung Colonel B.S. Uppal aser Lieutenant Colonel Duanyug Kang nati anir aden,” ta Goswami ashi.
“Sentong agiba mapang linük anaprong indang wako ajungket aser India o China na nung sepai tanishirtemi o jembia liasü koba ajanga tembar temeim tali tashi itshi.
Iba den külemi India nungeri sobaliba sentong kar agia liasü. Linük anaprong nungi iba senden nung adenertem kanga sadok sensak asem,” ta Goswami-isa ashi.
“Senden nung adener ajak tesendaktep tajung nung LAC tesem nung yimjung ayutsü tangatetba tajung ngur senshi. Linük anaprongi yimjung nung kanga junga alitsü asoshi linük anati sign asüba tenangzüktepbatem tashi ita benshitsü tangatetba yur senshi,” ta paisa ashi.

You must be logged in to post a comment Login