India aser Cyprus nati tezüngzüktep 4 agi

New Delhi, April 28, 2017: Hokolbanü New Delhi, Rashtrapati Bhavan nung sentong ka ayongzüka Cyprus Tir, Nicos Anastasiades (tiyong) agizükba sülen pa den Ato kilonser, Narendra Modi aser Tir, Pranab Mukherjee nungeri osangbenertem den jembitsü atema aoba noksa nung angur.

New Delhi, April 28 (Agencies): Hokolbarnü Ato kilonser, Narendra Modi aser Cyprus Tir, Nicos Anastasiades nati linük ana tesendaktep aser regional onüktem nung o lemtepba sülen, linük ana tsüngda air services aser merchant shipping nung amalitepa inyaktsü densema tezüngzüktep pezü agiogo.
Osangbenertem senden nung külemi jembidang Modi-i, India-i tongtibang onüktem nung Cyprus nungita arur aser parnok yimsüsüba, telongjem aser litsüa nungiter, ta ashi.
Linük ana tsüngda tesendaktep aser regional den International onüktem nunga o lemtepogo ta shia Ato kilonser, Modi-i, “Tesem nung rara adokdaktsür, rara nungiter aser tejenokdak agütsürtem anema linük ajaki longjemer inyaktsü nüngdak ta künati bangjemogo,” ta metetdaktsü.
Linük anatisa United Nations Security Council (UNSC) nung ozüngtem yanglushitsü nüngdak ta bangjemogo, ta shia Modi-i India-i UNSC nung permanent züngsem akumtsü atema benokba nung Cyprus-i nungitba atema pelar, ta metetdaktsü.
Tanep External affairs minister, Sushma Swaraj-ia Cyprus lenir ajurua liasü aser iba senden nung linük ana tesendaktep onüktem jembia liasü.