India aser France na tsüngda tezüngzüktep 14 agiogo

Metsüremi 10, 2018 nü New Delhi nung Ato kilonser, Narendra Modi and aser France Tir, Emmanuel Macron nati kulisüa repranga atadang linük ana tsüngda tezüngzükep agiba noksa nung angur. 

New Delhi, Metsüremi 10 (Agencies): Tanü Ato kilonser, Narendra Modi o France tir, Emmanuel Macron na senden mena defence, security, trade aser investment nung amalitepa inyaktsü atema jembiba sülen India aser France na tsüngda defence aser security nung amalitepa inyaktsü densema onük 14 nung tezüngzüktep agiogo.
Tezüngzüktep 14 rongnung France nunger Safran-i airline SpiceJet den engines supply asütsü, Davangere nung water system modernization, industrial gas company Air Liquide aser Sterlite tsüngda contract, French utility EDF aser India NPCIL tsüngda “Industrial Way Forward Agreement” ajanga nuclear reactors trok Jaitapur nung yanglutsü aser India nung next-generation nuclear reactors yanglutsü densema lir.
Yasüng Macron, New Delhi tonga aru, aser tanep sentong ka ayongzüka pa agizüka liasü.
MEA otongdar, Raveesh Kumar-i, “Asen tesendaktep nung otsü tasen ka tenzükogo! PM @narendramodi-i France Tir @EmmanuelMacron Hyderabad House, New Delhi nung pelaa agizük,” ta metetdaktsü.
Macron-i anogo pezünü atema India semdanga lir, aser yasüng airport nung Ato kilonser, Modi-i pa agizüka liasü.
Macron-isa linük Tir, Ram Nath Kovind aser Minister of External Affairs (MEA), Sushma Swaraj nata ajuruogo.
Yashi osangbenertem den jembidang MEA Joint Secretary, K. Nagaraj Naidu-i, “India aser France na space densema onük aika nung tesendaktep junga lir,” ta metetdakja liasü.
Naidu-isa, “France Tiri semdangba mapang nung maritime security aser kiralongra onük nunga o lemteptsü,” ta metetdaktsü.
April 2016 nungi March 2017 tsüngda India aser France na tsüngda shishilembabaji US sen billion 10.95 liasü.
India nung invest asüba linüktem rongnung jenjang 9buba nung France lir aser April 2000 nungi October 2017 tsüngda parnoki India nung invest asüba senji US sen billion 6 dak tema liasü.