India aser France nati linük tesendaktep atema senden amen

New Delhi, Luchii/December 15 (Agencies): India aser France linük na tesendaktep ano tajungba akumtsü aser Indo-Pacific region, defence, space aser civil nuclear energy sectors nung amalitepa inyaktsü atema tanü linük ana tsüngda senden ka ayonga menogo.
External affairs minister, Sushma Swaraj aser French minister of Europe & foreign affairs, Jean Yves Le Drian nati linük ana amalitepa inyakba nung tesendaktep tashi itshitsü atema jembi.
Osangbenertem den jembidang Swaraj-i, “Kanga tajangzük kaa senden menogo. Künati linük ana tsüngda lenla aika nung tesendaktep reprangshia liasü. Onoki Indo-Pacific region nung amalitepa inyakba jenjang ano tajungba akumtsüsa inyaktsü, koba ajanga linük ana ajangzükba dang masü daka region nung tanga linüktema ajangzüktsü,” ta metetdaktsü.
India aser France na tesendaktepji melung lemtepba nung ajemdaker yanglu, ta shia Swaraj-i, linük anati tanga sectors nunga amalitepa inyakba tashi taitba akumtsü atema lenmang bushidar, ta metetdaktsü.
“Asen linük ana tsüngda akhidang nungi defence nung tesendaktep junga lir, aser training den joint exercises ajanga aika lemsatepogo,” ta lai ashi.
External Affairs Minister-isa, linük anati senteper kiralongra anema raratsü atema bangjemogo, ta metetdaktsü.
“Space sector nunga tesendaktep tajungba akumtsü atema onoki inyakdar. Linük anapronglai anir climate change anema rarar,” ta lai ashi.
“Yaküm linük ana tsüngda shishilembabaji 9.62 billion euro liasü, 2022 küm tashi nung asenok tsüngda shishilembabaji 15 million euro asütsü atema linük anapronglai shishilembaba jenjang tajungba akumtsü atema inyaktsüla,” ta lai ashi.
France External Affairs minister, Le Drian-i, lenir anati Jaitapur, Maharashtra nung European Pressurized Reactor (EPR) project reprangshiogo, aser iba power plant amenoktsü atema tatembangsüa telemtetba ka agitsü atema asalentong yanglutsü asoshi bangjemogo, ta ashi.
“10 GW atema EPRs account 6 capacity ji, India-i 2030 küm tashi nungbo non-fossil fuels ajanga electricity shilem 40 adokdaktsütsü nükjidong nung lir, aser ibaji Paris Climate Conference jakdang nangzükba ka lir,” ta pai ashi.
Jaitapur project ajangasa Make in India yaritsü, kechiyong iba nungji production, technology, joint research & training densema lir, ta Le Drian-i shisem.
Paisa, lenir ana tsüngda shisa balala lemsatep aser nükjidong balala lemsatepogo, ta metetdaktsü.
“Taküm France aser India na strategic partnership küm 25 ajungba ya tia agi masü, saka linük anaponglai kasa onüktem tongtibang süa züngshiba, ozüng akhümtsübuba aser sustainable lima ka atema nükjdong yur inyakba ajanga lir,” ta pai metetdaktsü.
“Iba ya, France-i partner ka ama kodanga tamakok mengudaktsü ta India-i meteta lir aser tarutsü nunga melung atoktsüsa lir ta India-i meteta aliba ajanga lir. Indian Ocean nung linük ana tsüngda exchanges ajanga tanübo asenok kanga keraa renloker aser kiralongra anema longjemer rarar,” ta Le Drian-i ashi.
“Ano rongsenkettsüng tsütsülena onok company temi India nung Make in India programme kübok sen indoka inyaker. Urban development aser digital economy tsütsü onok company tem lir aser India den France yangertsü atema inyaker,” ta paisa shisem.
India linüki France nunger aerospace company Dassault Aviation dang nungi Rafale jets 36 aliba ken o nung mangatettep tulu adoka aliba mapang ka nung pai iba o ya jembiogo.
Ministry of External Affairs nungi tongti ketdangser kati, lenir anati senden nung Rafale deal onükbo süoka mejembi, ta metetdaktsü.