India aser France nati onük aika nung tesendaktep atema jembi

New Delhi, October 27, 2017: Hokolbarnü New Delhi nung India Defence Minister, Nirmala Sitharaman-i France Defence Minister, Florence Parly agizükba noksa nung angur. Tanü tena South Block, New Delhi nung senden ka mena liasü.

New Delhi, October 27 (Agencies): Hokolbarnü India aser France nati defence aser security tesendaktep tashi itshitsü aser military den maritime nung amalitepa inyaktsü atema jembiogo.
India Union Defence minister, Nirmala Sitharaman aser France Defence Minister, Florence Parley nati regional security aser defence project balala atema technology densema onük aika nung o lemtepa liasü, ta tanü ketdangser kati metetdaktsü.
Iba senden nung linük ana tsüngda defence aser security nung amaliteptsü aser maritime nunga amlalitepa inyaktsü atema o lemtepogo, ta ketdangserisa ashi.
Parley-i anogo ananü atema New Delhi semdanga lir, aser iba mapang nung lai Ato kilonser, Narendra Modi aser national security adviser, Ajit Doval nata ajuruogo.
France Tir, Emmanuel Macron-i India semdangtsü aliba dak sendakba nung lai jelia India semdangogo.
Yaküm linük ana tsüngda tezüngzüktep agiba sülen France-i India dangi sen crore 58,000 indang jet 36 yokogo, ano maneni India-i Rafale fighter jets mangatsü atema Parley den jembitsü imlar.
Brihostibarnü French Embassy-i sangdong ka ajanga, Parley-i India semdangba nükjidong ya India aser France na tsüngda defence nung amaliteptsü onük nung tashi tali itshitsü atema lir, ta metetdakja liasü.
Parley-i Sitharaman den senden amendang defence, maritime security, armed forces joint exercise aser counter-terrorism onüktem jembitsü, ta kasa sangdong ajanga metetdakja liasü.