India aser Germany na tezüngzüktep 18 agiogo

New Delhi, October 05 (Agencies): Germany Chancellor, Angela Merkel-i New Delhi semdangdang Hombar nü India aser Germany linük na tsüngda tezüngzüktep 18 tashi agiogo.
Linük ana tsüngda fast-track business approvals tezüngzüktep agiogo, iba tezüngzüktep ajanga Germany company temi Asia nung rongsenkettsüng jenjang tasembuba nung aliba linük, India den shishilembabaren mela-mela inyaktettsü.
Iba tezüngzüktep ya tang mezüng agiogo, aser iba ya Ato kilonser Narendra Modi-i “Make in India” mapatong atema bendangertemi linük nung sen intoktsü ayongzükba mapang ka nung iba tezüngzüktep agiogo.
Iba dak sentakba nung Commerce secretary, Amitabh Kant-i, fast-track inyakyim kübok India-i ita shia Germany company tem indang onük ajak reprangtsü, ta ashi.
Delhi nung Ato kilonser Narendra Modi aser Germany Chancellor Angela Merkel na onük aika nung ken o jembia tezüngzüktep 18 agiba sülen India aser Germany na tsüngda Defence oset yangluba, shishilembaba, intelligence aser clean energy nunga amaliteptsü bangjemogo.
Germany-i India nunger green energy corridor aser solar projects atema euro sen billion kati yaritsü.
Lenir ana tsüngda ghonda asem senden amenba sülen Modi-i, “India nunger rongsenkettsüng jenjang melenshitsü nükjidong ataloktsü asoshi Germany ji partner ka ama repranger. German tashi aser India tongtibang onüktemji kasa lir,” ta ashi.
German chancellor Angela Merkel den külem osangbenertem senden nung jembidang Modi-i, “Alima tsüngsang mopung melenshiba anema raratsü aser clean energy asoshi ni German lenirtem dang pelar,” ta ashi.
Tezüngzüktep agiba rongnung, India nung German oshi ajungkettsütsü aser Germany nung India nunger oshitem ajungkettsü atema HRD ministry aser Germany federal foreign office nati sangdongogo.