India aser Israel nati kiralongra anema raratsü: PM Modi

Jerusalem (Israel), July 05, 2017: Bodhbarnü Jerusalem nung Ato kilonser, Narendra Modi aser Israel Ato kilonser, Benjamin Netanyahu nati kulisüa repranga atadang India aser Israel nati tezüngzüktep tenet agiba noksa nung angur. 

Jerusalem/New Delhi, July 05 (Agencies): Bodhbarnü Ato kilonser, Narendra Modi-i, India aser Israel nati kiralongra anema senteper raratsü asoshi bangjemogo, ta metetdaktsü.
Ato kilonser, Narendra Modi aser Israel Ato kilkonser, Benjamin Netanyahu na leniba nung senden amenba sülen tenati külemi osangbenertem den jembidang Modi-i, “Kiralongra ajanga rara aser tesempa prokba agi India timtemogo, aser kasaji Israel-a timtemogo,” ta metetdaktsü.
Hokolbarnü Modi Israel linük tonga arua liasü, aser iba ya tang mezüng India Ato kilonser kati Israel semdangba lir. Linük ana tesendaktep yangluba sülen tang küm 25 jungogo.
Modi-isa, Netanyahu tenati linük ana tesendaktep onüktem dang masü saka alima nung yimjung atema-a jemiogo, ta metetdaktsü.
Linük ana nüburtem tesendaktep dak sendakba nung Modi-i, Israel nunger raliwalirtemi India semdangba kanga timba kümogo, aser India nunger kaketshir aika temaba shisaliok bushitsü atema Israel-i arur, ta ashi.
Netanyahu-ia, Modi-i linük semdangba ya pa atema mapang tajung ka lir, ta ashi.
Israel lenirisa, Israel-India tesendaktep ya kotak nung yanglu, ta ashiba den külemi Modi tenati sentongtem tera nungi akhanga inyaktsü bangjemogo ta metetdaktsü.
“Kiralongrar ajanga asenoki tayongzükba ajurur. Iba onük nunga linük anati amalitepa inyaktsü,” ta paisa ashi.
Netanyahu-isa, Modi tenati aluyimba aser tzü mangagement densema onük aika nung amalitepa inyaktsü atema o lemtepogo, ta metetdaktsü.
Bodhbarnü senden amenba sülen India aser Israel nati space technology nung amalitepa inyaktsü, India-Israel industrial R&D amenoktsü aser technological innovation fund densema tezüngzüktep tenet agiogo.