India aser Jordan na Football Friendly asayatsü

New Delhi, Mongputeni/October 24 (Agencies): Indian football team aser Jordan na Yimpoksüi/Nov 17 nü Amman nung tang mezüngbuba friendly match ka asayatsü.
“All India Football Federation-i Jordan den India senior national team asayatsüba osang jangjatsüogo. Iba asaya Amman nung Yimpoksüi/Nov 17, 2018 nü asayatsü,” ta AIFF sangdong ka ajanga metetdaktsü.
Iba asaya ya King Abdullah II International Stadium nung aonung 9:30 (IST) nungi tenzüka asayatsü.
Iba ita tetenzüklen Jordan team World Cup runners-up Croatia puri 1-2 agi kokogo aser parnok tang alima nung jenjang 110 buba nung lir aser India team jenjang 97buba nung lir.
Taküm küm tetenzüklen India U-16 national team Jordan den anaben asayaogo saka team ana ya tang tashi nung International Friendly ka danga asayaa mali. Bibiano Fernandes lenisüba kübok U-16 team-i asaya anaprongla koka liasü.
China den draw asüba sülen tang iba friendly asayatsü latetogo aser iba ajanga taruba küm AFC Asian Cup atema renemshiba nung India team nem teyari agütsütsü, koba Aenjeti/Jan 5 nü nungi tenzüktsü.
Coach Stephen Constantine-i iba asaya ya team asoshi tetendangba tulu ka asütsü ta bilemer.
“Iba asaya ya kuli aisü nungi kanga tongtibang asütsü. Mezüngbubaji Jordan ya team tajung ka lir aser onoki parnok Croatia den 1-2 agi tamakok anguba asaya nguogo.
“Onoki UAE nung ajangshitsüba jenjang angatettsü nüngdaker aser iba atema iba amala tetendangba nüngdaker. China den asaya tetendangba tulu ka liasü aser tang Jordan den asayatsü aliba ya kanga tongtibang,” ya Constantine-i ashi.
Group A nung India team UAE, Thailand aser Bahrain den asayatsü lemzüka lir.
Constantine-i ashiba agi, Amman aser UAE na condition mesüktepa lir aser iba ajanga continental championship nung shilem agitsü asoshi team nem teyari agütsütsü.
“Onok qualify asüba sülen onoki onok nem tetenzük nungi pressure agüja asayaba team den asayatsü nüngdaker ta angatet.
“Kasa mapang nung onoki Amman nung asayatsü koba Abu Dhabi aser Sharjah den tzü mopung mesüktepa lir,” ta paisa ashi.