India aser Kazakhstan nati Defence nung amalitepa inyaktsü

Astana/New Delhi, Luroi/August 03 (Agencies): External Affairs Minister, Sushma Swaraj-i Kazakhstan nung tongti lenirtem den shishilembaba, energy, security aser information technology nung asalentong tashi itshitsü atema jembiba sülen tanü India aser Kazakhstan nati defence nung ano taliba amalitepa inyaktsü atema tezüngzüktep agiogo.
India linüki totzü molamoshia aliba Asia linük asem- Kazakhstan, Kyrgyzstan aser Uzbekistan den tesendaktep tashi itshitsü nükjidong nung tang Swaraj-i item linük semdanger.
Lai Kazakh Foreign minister, Kairat Abdrakhmanov den senden amen.
Lenir anati shishilembaba aser investment, defence aser security, energy, Information & Communications Technology (ITC), pharma, capacity building aser culture nung ano taliba amalitepa inyaktsü atema jembi.
Central Asia nung India atema shishilembaba aser investment partner tulutibaji Kazakhstan lir.
Laisa Kazakhstan Ato kilonser, Bakytzhan Sagintayev ajurua shishilembaba aser investment, ICT, joint film production aser tourism nung ano taliba amalitepa inyaktsü atema tebilemba kar lemsatepa liasü.
Swaraj-i Abdrakhmanov den linük ana dak sendakba, regional aser alima onüktem nung o lemtepa liasü.
Lai twitter ajanga, “Onoki asen linük ana tesendaktep reprangshi. India aser Kazakhstan na tesendaktepji putu aika tejen aser sobaliba aung tesendaktep amenoka lir. India aser Kazakhstan napronglai 2009 küm nungi lenla aika nung amalitepa inyaker,” ta metetdaktsü.
“Abdrakhmanov künati defence nung ano taliba amalitepa inyaktsü asoshi jembi. Tesüiba küm ana tsüngda asen linük ana defence aser security sector nung amalitepa inyakba jenjang tajungba kümogo,” ta laisa metetdaktsü.
“Ato kilonser (Narendra) Modi lenisüba kübok India-i ‘Make in India’, ‘Digital India’, ‘Clean India’, Start up India, 100 smart cities ama flagship programme aika tenzükogo. Ni Foreign Minister Abdrakhmanov dang Digital Kazakhstan programme atema Digital India programme nungi tangazüktsü aika lir ta shiogo,” ta lai metetdaktsü.
Yashi Swaraj-i Kazakhstan nung aliba India sensotem ajurua jembia liasü.