India aser Nepal tezüngzüktep 8 agi; Deuba-i Modi jaoker

New Delhi, August 24, 2017: Brihostibarnü New Delhi, Rajhat nung Nepal Ato kilonser, Sher Bahadur Deuba-i Mahatma Gandhi nem akhüm agutsüba noksa nung angur. Deuba-i anogo pongunü atema India semdanga lir. Tanep Tir, Ram Nath Kovind aser Ato kilonser, Narendra Modi nati pa Rashtrapati Bhavan nung agizüka liasü.

New Delhi, August 24 (Agencies): India aser Nepal nati temesepba mozü belenba anema inyaktsü densema onük 8 nung tezüngzüktep agiogo, ta Brihostibarnü Ato kilonser, Narendra Modi-i metetdaktsü.
Tanep New Delhi nung Modi o Nepal Ato kilonser, Sher Bahadur Deuba na senden amenba sülen Modi-i iba sangdong agütsü.
Iba senden jakdang linük ana leniri Nepal nung cross-border power transmission lines ana semzükja liasü.
Ato kilonser, Modi-isa, Deuba-i pa dang hydroelectric project Arun III amenoktsü atema kimong nguogo ta metetdaktsüogo. Item projects semzüktsütsü atema Nepal Ato kilonser, Deuba-i Modi jaoka liasü.
“Deuba-i kü dang Arun III atema ali nguogo ta metetdaktsü. Ibaji semzüktsü atema ni jaokba atema ni pa dang pelar,” ta Modi-i ashi.
Sen crore 5,723.72 indoka 900 MW hydro power project ya Nepal, Sankhuwasabha district nung amenoktsü. Taküm February ita nung Indian sorkari iba project agizüka liasü.
“Nepal terenlok aser azükaru nung partner asüba ya India tia taka. Asen linük anati energy, water resources, connectivity projects nung senteper inyaker,” ta Modi-isa ashi.
Modi-i, tanü Nepal lenir den senden mena onük balala jembiba ajanga linük ana tesendaktep ano tashi taitba akumtsü imlar, ta ashi.
Brihostibarnü Deuba-i anogo 5 nü India semdanga arua lir, aser tanep Tir, Ram Nath Kovind aser Modi nati pa Rashtrapati Bhavan kima agizüka liasü.
Deuba-i New Delhi dak alia Hyderabad, Tirupati aser Bodh Gaya tema semdangtsü.
Tawa China lenir, Wang Yang-i Nepal semdanga liasü aser iba mapang nung linük anati energy aser rongsenkettsüng tesendaktep tajungba akumtsü atema tezüngzüktep aika agiba sülen anogo ishika tsüngda Nepal leniri India semdangogo.