India aser Pak na tsüngda nuclear rara adoktsüa akok: NYT

Washington, March 09 (Agencies): India aser Pakistan na tsüngda nuclear rara adoktsüa akok, kechiyong kidanger linük anati Kashmir onük latettsü atema meinyakra khenpiga atema tensa süngjemba jagi kecha masutsü, ta New York Times osangkaket ocet ka ajanga metetdaktsü.
NYT osangkaket yimobilem nung ashiba agi, India aser Pakistan na tsüngda tang tensa süngjemaka linük anati bendenba raraba osettemji amshitsüsa akumtsü.
NYT Editorial Board-isa, khenpiga atema tensa süngjemba jagi kecha masutsü; anungji India aser Pakistan na tsüngda tensa junga süngjemdaktsütsü atema US-i shilem agia inyaktsüla, ta ashi.
“India aser Pakistan nati ken o jembiba ajanga tongti mangatettep onük – Kashmir onük latettsü memelungra kechi ang ataloktsüar memetet, aser ibajibo tetsübutsüka asutsü,” ta parnokisa ashi.
NYT-i ashiba agi, tarutsü nung kidanger linük ana tsüngda tensa raksara ibajibo melamela mesüngjemtsü.
“India-i amakba ajanga Pakistan sepaitem melung ajema makümtsü aser tila akumtsü memelungi rara tulu adoktsüa akok. Pakistan Ato kilonser, Imran Khan-i yimjung temaitsü India nem pilot meyipa agutsü, aser ken o jembitsü atema ayongzükba den külemi bomb pokloktsüba (Pulwama nung CRPF amakba) tatalokba bushisüngdangtsü melungogo. Yamaji Modi (Ato kilonser)-ia maongka agia tensa tamajungba mekümdaktsüi süngjemogo,” ta NYT-i ashi.
“Ajisüaka ano rara adokra ibajibo melamela mesüngjemtettsü,” ta parnokisa shisem.
Taküm February 14 nü Jaish-e-Mohammad (JeM) kiralongrartemi J&K kübok Pulwama nung CRPF gari nung bomb poklokja amakba lendong nung sepai 40 asüba sülen India aser Pakistan na tsüngda tensa mejungi akum.
Ibaji mangyanga India-ia Pakistan kübok Balakot nung kiralongrartem training camp amak. Tasüngnüji Pakistan-ia Air Force tayimtsü India litsüi yoka liasü.
NYT-i, Kashmir nung kiralongrartemi amakba nokdangtsü atema India-i kiralongrar anema raraba nung US-i yaritsü akok, ta ashi.
“Tang India aser Pakistan nati atsüanemtsü merangba mapang ka nung US-i yaritsü asoshi renema alitsüla,” ta NYT-i metetdaktsü.
Islamabad aser New Delhi na ya alima nung kidanger tsükchir linüktem rongnung densema lir, ajisüaka tensa süngjemba atema pelar, ta parnoki ashi.
“Kashmir atema nüchiso bushir JeM-i parnok sasa bomb pokloktsüba atema tenüng agiogo. Iba telok ya America nunger kiralongrar tarensen nungbo densema lir, aser Pakistan nunga nokdanga lir, ajisüaka Pakistani intelligence service-i parnok pusemer,” ta NYT ocet nung shia lir.
NYT-i, India aser Pakistan na tsüngda tensa kanga mejungi akumtsüsa liasü, kechiyong tesüiba küm 70 nung linük anati asembenbo raraogo, mapang ajak nung arrtsülen sepaitem renema lir saka sorkar tsüngda ken o jembitsübo memelunger, ta ashi.
“Iba nungji totzü shiloktsür ama election nüboyim nung Ato kilonser, Narendra Modi-i Hindu ajungkettsütsü atema Pakistan anema o jembir,” ta NYT-i ashi.
Parnokisa, “India amaker kiralongrartem anema Pakistan-i kodanga süoki ia meinyaker,” ta ashi.
“Tawa Pakistan ketdangsertemi JeM tongti Masood Azhar’er adianu ka densema telungpur telok balala nungi züngsem 44 puogo, aser kiralongrartem indang kiojen sota ayutsü meranger. Ajisüaka Pakistan-i nangzükba ama meinyaki arur,” ta parnokisa ashi.
Alima linüktemi majungshira teti atema mangatettep ken o mebentettsü aser nuclear rara amokmeren alitsü, ta parnokisa shisem.