India aser Portugal linük na tsüngda tezüngzüktep 11 agiogo

Lisbon, June 25, 2017: Deobarnü Portugal yimtiba, Lisbon nung India Ato kilonser, Narendra Modi aser Portugal Ato kilonser, Antonio Costa na salemba noksa nung angur.

Lisbon/New Delhi, June 24 (Agencies): Honibarnü Ato kilonser, Narendra Modi-i Portugal Ato kilonser, Antonio Costa den senden mena onük aika nung o lemtepba sülen linük ana tsüngda tesendaktep tashi itshitsü atema tezüngzüktep 11 agiogo.
Science & technology, shisaliok, kiralongra anemba aser climate change densema linük anati tezüngzüktep 11 agi.
Linük anatisa science & technology nung research agiba nung senteper euro sen million pezü intoktsü, ta sangdong.
Tezüngzüktep 11 agiba sülen osangbenertem den jembidang Modi aser Costa nati, tesüiba ita 6 tsüngda linük ana tesendaktep tashi itshiogo, ta ashi.
Tezüngzüktep rongnungsa outer space, double taxation avoidance, nano technology, sobaliba tesendaktep, lanur aser saisapong, temaba shisaliok aser scientific research iba den külemi Portugal-India business hub aser Indian Chamber of Commerce densema lir.
Tang mezüng Portugal semdangba sülen Modi-i, “Tanü künati onük aika nung o lemtepogo. Portugal rongsenkettsüng asentenshiba aser India kanga keraa ainba ajanga linük ana külemi aintsü maongka tajung agütsür,” ta metetdaktsü.
Technology nung mera tasen agia Modi-isa, science & technology atema linük anati senteper Euro sen million 4 indoktsü, ta sangdong.
“Linük anati kiralongra anema amalitepa inyaktsü bangjemogo,” ta Modi-isa metetdaktsü.
UN Security Council nung permanent züngsem akumtsü atema Portugal-i India nungitba atema Modi-i pelaba metetdaktsü.
India nunger Ato kilonser kati danga linük ana tesendaktep atema Portugal mesemdang, ta shia Narendra Modi-i, startups, marine technology aser oceanography densema onük aika nung linük anati amalitepa inyaktsü, ta metetdaktsü.
Iba sülen lenir anati Portugal yimtiba, Lisbon nung India-Portugal International Startup Hub tenzükja liasü.
Portugal Ato kilonser, Antonio Costa ya Goa (India) origin lir aser taküm January ita nung pai-a India semdanga liasü.
Ano Costa-ia, Portugal nung aliba India sensotemi Portugal rongsenkettsüng aser loktiliba ajungkettsüba nung shilem agiba atema pelaba metetdaktsü.