India aser Russia senteper helicopter 200 yanglutsü

Moscow, July 19 (Agencies): India-Russia tesentaktep onük dak sentakba nung aser India nunger defence jenjang tajungba akümtsü nükjidong nung Russia den senteper India nung helicopter 200 yanglutsü.
‘Make in India’ programme nung ajemdaker iba kübok defence project tasen aika rongnung iba telemtetba ya tawa agiogo, ta Moscow, Russia nung Indian Ambassador P S Raghavan-i osangbenertem dang ashi.
Paisa ashiba agi, India-i tawa France dang nungi Rafale fighter tayimtsü 36 alitsü telemtetba agiba densema India-i tanga linüktem dang nungi defence osettem aliaka akhi mapang nungi defence nung Russia-i India den amalitepbaji kasa dang lir.
“Iba (India-Russia tesentaktep) ya tuluka lir aser anogoshia tuluba dang akümer,” ta paisa ashi.
“India nung senteper helicopter yanglutsü asoshi tawa onoki telemtetba agiogo. India nung senteper helicopter 200 yanglutsüji kanga ulura. Linük anati technology aser license production lemsatepa India nung helicopter 200 yanglutsü melungtetra, iba yabo ulura,” ta pai ashi.
Iba ya ‘Make in India’ mapatong kübok mezüngbuba defence project ka asütsü, ta paisa ashi.
New Delhi (India)-i raraba osettem alitsü asoshi tanga linüktem nung bushiba ajanga India aser Russia na defence tesentaktep tamajungba akümer ta asüba tangatetba nung tasüngdangba ka langzüdang pai item o jembia liasü.