India aser Russia tsüngda tenangzüktep aika agi

New Delhi, Mongputeni (October) 5 (Agencies): Hokolbarnü India-i $5 billion agi Russian S-400 Triumf missile shield systems alizüktsü atema tenangzüktep agiogo.
Prime Minister Narendra Modi aser Russin President Vladimir Putin na senden amenba sülen linük ana tsüngda iba tenangzüktep agi.
19 buba India-Russia annual bilateral summit nung lennir anaprong lia tenangzüktep nung sign asü, ta ketdangsertemi ashi.
S-400 missile defence system tenangzüktep ya Countering America’s Adversaries Through Sanctions Act (CAATSA) kübok tenokdangba angutsü akok, kechiyong CAATSA temzüng nung Russia nungi prangpong-injang alizükba linüktem merenshitsü lateta lir.
Ajisüaka, tanü India aser Russia tsüngda tenangzüktep agiba sülen US embassy-i sangdong ka agütsüba nung tenokdangba tenokdangbaji Russia den yaritepertem masü saka Russia merenshitsü atema dang lir ta metetdaktsü.
Tanü India aser Russia tsüngda railways, space aser nuclear power dak sendakba tenangzükba 8 tashi agi.
Taküm küm tsüngda Modi aser Putin na asemben tashi ajurutepa sendenten menogo. Taküm May ita tena Russia yimti Sochi nung aser July ita South Africa nung BRICS Summit alidang ajurutep.

You must be logged in to post a comment Login