India aser Spain tsüngda tezüngzüktep tenet agiogo

Madrid, May 31, 2017: Bodhbarnü Spain linük yimtiba, Madrid nung aliba La Moncloa Palace nung India Ato kilonser, Narendra Modi aser Spain Tir, Mariano Rajoy nati kulisüa repranga atadang India aser Spain na tsüngda tezüngzüktep balala agiba noksa nung angur. 

New Delhi/Madrid, May 31 (Agencies): Tang Ato kilonser, Narendra Modi-i Spain linük semdanga aliba mapang nung Bodhbarnü India aser Spain na tsüngda cyber security aser civil aviation nung amalitepa inyaktsü densema tezüngzüktep tenet agiogo.
Spain yimtiba, Madrid nung aliba Moncloa Palace nung Ato kiolonser, Modi aser Spain Tir, Mariano Rajoy nati onük aika nung ken o jembiba sülen linük ana tsüngda tezüngzüktepji agia liasü.
Linük anatisa linük ana nung obendang agüja aliba nisungtem indang aser visa holders indanga tezüngzüktep agia liasü.
Ano organ transplantation, cyber security, renewable energy, civil aviation aser India’er Foreign Service Institute aser Diplomatic Academy of Spain tsüngda amalitepa inyaktsü atema tezüngzüktep pongu agiogo.
1988 küm sülenbo tang mezüng India Ato kilonser, kati (Modi) Spain semdangogo.
Spain Tir nem tenüngsang agüja Modi-i, Rajoy leniba kübok linük rongsenkettsüng nung temelenshi tulu kaogo, ta ashi.
Eurprean Union nung India atema shishilembaba partner jenjang tenetbuba nung Spain lir. 2016 küm linük ana tsüngda shishilembabaji US sen billion 5.27 liasü.
Modi-isa Spain ketdangsertem dang infrastructure, tourism, energy aser defense company temi India nung sen indoka inyaktsü asüngdanga liasü.