India aser Thailand na defence tesentaktep yanglutsü

New Delhi, June 17 (Agencies): Hokolbarnü India aser Thailand linük nati rongsenkettsüng, kiralongraba anema raraba, cyber security, temesepba mozü  aser nisung shibelenba anema amalitepa inyaktsü bangjemba den külemi defence aser maritime security nunga tesentaktep tajungba yanglushitsü atema bangjemogo.
New Delhi nung Ato Kilonser, Narendra Modi aser Thailand Ato kilonser, General Prayut Chan-o-cha na onük aika nung ken o tatsü talang jembiba sülen iba sangdong ya agütsü.
Modi-i, India-Myanmar-Thailand Trilateral highway tekaraba nung renemtsü aser India, Thailand o Myanmar tsüngda tekaraba nung Motor Vehicles Agreement tezüngzüktep agitsü atema nendaka inyaktsü jembiogo, ta metetdaktsü.
Iba senden nung Army Chief, Dalbir Singh Suhag-a densema liasü, aser iba mapang tezüngzüktep ana- 2016-19 Executive Programme of Cultural Exchange (Extension of CEP) aser Nagaland University o Chiang Mai University, Thailand na tsüngda tezüngzüktep agi.
Thailand nungi raliwalirtemi India sapua semdangtsü nükjidong nung Modi-i, kobi melii India-i Thailand sensotem atema double entry e-tourist visa agütsütsü, ta metetdaktsü.
Kiralongraba dak sentakba nung Modi-i, kiralongraba prokshiba aser kiralongra amokmeren ya linük anaprong atema ka tayongzükba ka lir, ta ashi.
Osangbenertem den jembidang Modi-i, “Kiralongraba dak alia cyber security, temesepba mozü shibelenba, rongsenkettsüng tsütsü ozüng alema inyakbatem aser nisung shibelenba onüktem nung security tesentaktep tajungba akumtsü atema bangjemogo,” ta metetdaktsü.
India aser Thailand na ya tzü tsütsülena kidanger lir ta shia Modi-i, defence aser maritime nunga linük ana tesentaktep tajungba akümtsü atema bangjemogo, ta ashi.