India aser US-i Islamic kiralongraba anema raratsü: Donald Trump

Ahmedabad, February 24 (Agencies): United States (US) aser India-i Islamic kiralongraba nungi pei sensotem kümzüka ayutsü aser linük ana tsüngda defence tesentaktep akangshitsü, ta US President Donald Trump-i ashi.
US-i India meimer aser akhümtsübur aser linük ana tsüngda shishilembaba tsütsü tenangzüktep tajunga ka agitsü lir, ta paisa shisem.
Mongulbarnü linük ana tsüngda $3 billion alang defence tenangzükteptem agitsü aser US ya India indang ‘defence partner’ tajungtiba asütsü, ta Donald Trump-isa ashi.
Hombarnü Ahmedabad nung aliba Motera stadium nung ‘Namaste Trump’ sentong nung jembidang Trump-i iba osang metetdaktsü.
Hombarnü Ahmedabad nung Prime Minister Narendra Modi-i Trump pela agizük. “US ya India indang medemer tajung ka asütsü. Prime Minister Modi ya linük atema tanen makai inyakba lennir tajung ka lir” ta Trump-i ashi.
“India aser US nati kiralongrar aser parnok tangatetbatem anema raratsü. Iba jagi ozü sorkari Pakistan den kiralongraba teloktem anema rarar. US ya India atema medemer tajung ka asütsü aser nenoki yamai meraketa pelaa agizükba atema kanga pelar” ta paisa metetdaktsü.
Modi-i o jembidang “alima nung democracy tulutibai Trump pelashishia agizüker aser putiotsü tasen ka tenzükogo” ta ashi.
“President Trump aser par kibongi India semdangba ajanga India aser US tsüngda tesentaktep tajung aliba sayur” ta Modi-isa shisem.
US President Trump aser First Lady Melania Trump nati Agra nung Taj Mahal semdangba sülen taonung New Delhi tongogo.
Trump aser kinungtsü Melania na den tena jala Ivanka aser la kinungbo Jared Kushner na arua lir.