India aser US sepaitem Joint Military Drill alir ; India sepaitem Afghanistan-i meyoktsü: Sitharaman

New Delhi, September 26 (Agencies): “Yuddh Abhyas” ta ser India aser US sepaitem külem sentong agidang America nunger sepai kati INSAS rifle ka mezüng khadangba sülen “ni iba prangpong sakloker, kanga anepaneper” ta ashi.
Taküm “Yuddh Abhyas” ya Washington nung aliba US Joint Base Lewis McChord nung alir aser kasa mapang US Defence Secretary James Mattis-i India semdangi arua lir.
James ya US tir Trump den tesentaktep tajung aliba nisung ka lir aser tanü pai Delhi nung Prime Minister Narendra Modi aser Defence Minister Nirmala Sitharaman na den ajurutep.
Yudh Abhyas ya September 14, 2017 nü tenzük aser asüng tembangtsü. Linük ana tsüngda military training & defence corporation programme talangtiba agibaji iba ya lir.
Tanü Nirmala Sitharaman-i “Asen military-to-military engagement tajungba küma aoer. Tanü olemtep nung specialised exercises talila agitsü atema jembitepogo” ta ashi.
Yuddh Abhyas 2017 nung linük anaprongi organisational structure aser battle procedures angazükteptsü. Iba ya ajanga India aser US sepaitemi alima tesem mashi ka nung külemi inyaktettsü, ta Defence Ministry-i metetdaktsü.
Tanü Defence Minister Nirmala Sitharaman aser US defence minister James Mattis na senden amendang India-i Afghanistan nung sepaitem melemzüktsütsü ta Nirmala-i ashi.
“Senden nung cross-border terrorism indang tongti süa jembiogo. Iba asoshi linük anaprongi külemi inyaktsü lemtet” ta lai osangbener senden nung ashi.
Mattis-isa ashiba agi, kiralongrartem jenokba tesemtem asoshi maremzüktsü.
India-i Afghanistan nung yaritepba atema paisa pelaba metetdaktsü.
Afghanistan nung terenlok mapa inyakertem rongnung India ya temaba jenjang nung lir. Ajisüaka, US-i mepishiaka India-i Afghanistan nung sepaitem mapa lemzüktsütsü memulunger.
“Afghan nunger li nung India nunger sepaitem tetsüng majemoktsü” ta tanü Sitharaman-isa osangbener dang ashi.