India aser US tsüngda defence cooperation akangshir

New Delhi, February 25 (Agencies): Bodbarnü US Embassy nung India Inc. den ajurutepa sensaksemdang US Tir Donald Trump-i “Washington-i Delhi den shishilembateptsü tenangzüktep ka agitsü atema mapa inyakdar” ta ashi.
“India aser US tsüngda defence cooperation tuluba kümogo aser India-i $3 billion den teimba agi American military equipment alizüktsü. Iba nung Apache aser MH-60 Romeo helicopters dena lir” ta Trump-i ashi.
Trump-i Prime Minister Narendra Modi den senden amendang shishilembatsü, kiralongraba anema raratsü aser energy cooperation onüktem lemsatep.
“Linük anaprongi Islamic terrorism nungi pei pei sensotem kümzüka ayutsü tenangzükba agiogo. Iba atema inyakba nung, US-i Pakistan den par linük nung amenoka aliba kiralongrartem anema takok ngua inyaka arudar” ta paisa metetdaktsü.
“Prime Minister Modi den jembiba onüktem rongnung tongtipang kaji ‘bilateral economic relationships’ yanglutsüba indang liasü. Linük anaprong ajangzüktsüsa tenangzüktep ka agitsü imlar. Ni US tir inyaktsü tenzükba nungi India dangi US exports 60% aser high quality American energy 500% tashi ajungketogo” ta Trump-isa ashi.
Linük ana tsüngda rongsenkettsüng tesentaktep akangshitsü atema India nung US International Development Finance Cooperation ka teti atema lapoktsü, ta paisa ashi.
“Prime Minister Modi künati US, India, Australia aser Japan den Quad initiative tenzükshitsü atema mapa inyaker” ta Trump-isa metetdaktsü.
“India den tesentaktep akangshitsü atema inyakdang, linük ana ya democracy aser constitutions kasasa ajanga longjema lir ta asüba bilemteter. Democracy aser constitutions ajanga nüjiso, nisungtem temeten aser ozüngtem kümzüka ayur” ta Trump-isa shisem.
India Foreign Secretary Harsh Vardhan Shringla-ia osangbener senden ka nung “India-i US ketdangsertem den H1-B visa indang onük lemsatepogo aser IT sector nung Indian professionals-i shilem agiba shiogo” ta metetdaktsü.

Trump-i Modi den CAA onük jembi
New Delhi, February 25 (Agencies): “Ni Prime Minister Narendra Modi den tamangba tsütsü nüjiso indang onük jembi aser idangji pai India-i iba atema kanga meranga inyakogo langzü” ta Mongulbarnü US President Donald Trump-i osangbenertem ashi.
“Ajisüaka, ni Delhi nung tensa mejungi akümba indang onükbo mejembi” ta paisa ashi.
“Prime Minister-i kü dang India-i mapang talangka tamangba indang nüjiso atema meranga inyakogo ta ashi. Künati CAA atema talangka jembi. Nübortemi tamangba nüjiso ngudaktsünür ta pai (Modi) kü dang ashi. Ni Delhi nung atalokba osang angashiogo saka pa den mejembi” ta Trump-i ashi.
“Delhi nung tensa mejungi akümba ya India-i par sasa dang bentettsü” ta paisa shisem.
Osangbenertemisa US President dang Citizenship Amendment Act (CAA) atema asüngdangdang “Ni iba indang mejembinür. Ibaji India-i jembitsü. Parnoki (sorkar) India nunger atema mapa shitak inyaktsü imlar” ta Trump-i langzü.