India aser Vietnam nati Indo-Pacific atema inyaktsü bangjem

Metsüremi 03, 2018 nü New Delhi nung Veitnam Tir, Tran Dai Quang aser Ato kilonser, Narendra Modi na senden amentsü atema Hyderabad House nung ajuruba noksa nung angur.

New Delhi, Metsüremi 03 (Agencies): China linük nem osang ka metetdaktsür mesüka, tanü India aser Vietnam nati Indo-Pacific region azükarutsü atema inyaktsü bangjem, iba denji külemi rongsenkettsüng aser shishilembaba densema onük asem nung amalitepa inyaktsü bangjemogo.
New Delhi nung senden ka amenba sülen osangbenertem senden nung Vietnam Tir, Tran Dai Quang aser India Ato kilonser, Narendra Modi nati külemi osangbenertem den jembidang Modi-i, “Indo-Pacific region nung azükaru alitsü, iba den külemi sovereignty aser International ozüngtem akhümtsübutsü aser ken o jembiba ajanga mangatettep onüktem bentettsü asoshi onoki külemi inyaktsü,” ta metetdaktsü.
Paisa, “Linük ana tsüngda maritime tesendaktep tajungba akumtsü atema künati bangjemogo,” ta ashi.
Ano külen Quang-i, linük anapronglai regional security atema inyaktsü, aser iba nungji maritime aser cyber security densema lir, ta metetdaktsü.
China-i Indian Ocean region aser South China Sea nung kanga ambangyima inyakba mapang ka nung linük anati iba osang sangdongogo.
Modi-i, Vietnam-i New Delhi indang Act East Policy aser India- Association of Southeast Asian Nations (Asean) regional bloc tesendaktep nung tongtibang shilem agir, ta ashi.
India aser Asean tsüngda India atema coordinator ji Veitnam linük kija lir, aser iba dak sendakba nung taküm Thailand nung ozüng ka agizüktsü.
2016 küm Ato kilonseri Vietnam semdangba bilemteta Modi-i, linük ana tesendaktepji Strategic Partnership aliba nungi Comprehensive Strategic Partnership akum, ta ashi.
“Linük ana tesendaktep yanglur yaküm küm 45 ajungba mongogo aser Strategic Partnership yanglur küm 10 ajungba mongogo,” ta paisa metetdaktsü.
“Asenok tesendaktep ya sorkar ana tsüngda kija masü saka asenok civilization tesendaktepji küm 2,000 tain lir,” ta Modi-i ashi.
Modi-i, linük ana ya terenlokdak linüktem lir aser taoba mapang ajangshibatem ajanga tajangzük ngudar, ta ashi.
“India nung Vietnam nunger aika shisaliok den külemi technical densema tanga lenla aika nung training agiogo,” ta paisa ashi.
Rogonü (Hokolbar) Quang, Bodh Gaya tonga aru aser nikongdang Delhi-i arua liasü.