India asoshi tashi

India nungertem British yimten yimsüsüba kübok lia aruba nungi nüchiso ngur tang agi küm 72 buba anogomong amongba anogo tashi nung alima tashitemetet aser rongsen tsütsülen kanga renlokogo. Joko, alima kintem rongnung ali nung dang masü saka anüng petinu tashi tuagi shisatsü aser rongsen bushiba maparen nung India kanga tashi itta inyaker. Joko, Asia nungbo China serbo India-ang tashitaitba akümtsü amai alima kintemi kanga nükentsübua repranger. Chiyongtsü nungi shir raraba osettem tashi joko India nung adokba aser yangluba agi peritsüsa India tashi itta lir. Iba amaji alima rongsen aser shisatsü nung India anünga maliba agi India nunger ajak alima tsüngdang nümadangtettsüsa mapang ka agi tongogo. Ajisüaka ano külen, tanü India nükenbelemtsüsa tensa tia ka ajurubaji tamangba yimsü aser sobalibaren balala tsüngda yimten tashi amshia maremzüktet akümba ya asütsü. India lima ya alushia ulura aser kin kidong inra, anungji alima nung akaba tamangba yimsü balala amangertem ajak lir aser kin shia oshi aser sobaliba balala asünungji, item ajakji züngoka akümketa amshitsü nüngdaker. Iba jagi India lima topur jungdaktsübaji, kin kidong, oshioben aser sobaliba tapu aika liaka telongjem ka ser kin ka tashi itta otetbaji lir ta jembir. Atangji, ibaji shitak lir, kechiyong India ama kin kidong aser oshi zünger mezüngma aser  yamaji kin shia achiajem sobaliba balala den tamangba yimsü balala süaka temzüng ozüng ka kübok küm 70 dak tali telongjem ka nung arutetbaji takok tulu lir. Iba tashiji sobaliba balala den  tamangba yimsü balala amangertem rongnung kati ka akümtsübutepa aremzüktepa aruba ajanga anguba tashi lir. India nungersa süaka kar Hindu, kar Muslim, kar  Khristan aser tanga tamangba yimsü amangertem aika lir, item rongnungji kari shi achir saka karibo machir. Shi achirtem rongnunga kari akshi machir aser kari nashi shi machir ano kar atemabo nashiji tsüngrem ama amshir ta asüba nisungtem külemi alitsübaji temela masü. Aji oda, shi machirtem shi achirtem den shi asoba menema alitsübaji timtem tulu lir. Iba amaji akshi machirtem tsüngdang akshi lepa ayokba aser nashi agi tsüngrem ama züngshirtem tsüngdang lenjang nung nashi tepseta ayokba mapatem ajakji mebilemdangi inyakba mapa amato akümer. Item ama maparen aika nung kati ka akümtsübutepa inyaktsübaji kanga nüngdaker. Atangji, koba yimsü amangdir amangaka Tsüngrem dak amanger aser koba sobaliba südir süaka pei kin sobaliba, anungji item ajakji timtem majurui sademsadema benshia otettsü asoshi temzüngi senso ajak nem pei amangnütsü amangtsü aser pei sobaliba benshitsü asoshi temeten aser temelaba agüja lir. Aji oda, India nung Hindu nunger tiemba süaka tanga yimsü amangertembo India nunger masü ta masü. India yimten nüchiso asoshi 1857 küm nungi tenzüka British nungertem den raraba tongpang nung Hindu nungertem dang nungibo Muslim aser Khristan purtemiang tongti shilem tuluba agiba otsü aika lir. Tanübo item otsü ajakji tamadok kümer, nisung karibo India ya Hindu nunger meyong ta bilema alitsü akok. Aji oda, state kar nungbo Hindu nunger Khristan kümra ajibo ozüng anema saka Khristan purtem Hindu yimsü dangi meyipra, ajibo tim dang ta asüba ozünga lateta lir. Ibaji dang masü saka state kar nungbo nashi shi kenyongi mamshidaktsür aser nashi meiner senzüa lira telok ayongdener itemji zükseta südaktsüba tatalokba aika atalokdagi. Iba ama tia nung, India nunger yimten nüchiso ngur küm 72 buba amongba anogo nunga, India nunger senso karbo pei amangnüba yimsü amangtsübaji tetsübutsüka aser pei chinüba aon bushia chiyongtsübaji ozüng anema asütsüsa talenba tia nung lir. Item asoshiang ano nüchiso nüngdaker. India ya tamangba yimsü jurila ka meyong masü mesüra kin kidong kati India ajunga amanglemtsübaji makoktsü. India telongjem ya meraksai maneni kin ka ama tashi itta aotsüba tashijibo alima rongsen aser raraba oset yangluteta akabatem nungi masü saka India nungertem rongnung kati ka tamangba yimsü aser sobaliba akümtsübua züngshiba nungi adoktsü. Iba tashijiang India meimer yimsüsürtemi maneni bushitsüla.